Contribuc ai pendolars, domandes online dai 5 de aurí
Da en mertesc ai 5 de aurí cina en jöbia ai 30 de jügn pó i pendolars presenté les domandes de contribut che reverda l’ann 2015. Sciöche bele sozedü ti ultims dui agn pó les domandes ma plü gní scrites fora online, „dantadöt – comentëia l’assessur Mussner – por smendrí la burocrazia y alisiré les prozedöres“.
Nia sciöche bele anunzié dal 1 de aurí mo impormó dai 5 de aurí podará la presentaziun dles domandes por contribuc ai pendolars gní dada jö. Cina ai 30 de jügn sarál spo poscibl da dé jö les domandes por ciafé n contribut por pendolars che fej na trata lungia o complicada por rové al post de laur. Le dërt da presenté domanda á i dependënc y les dependëntes che se tëgn sö de regola tla provinzia de Balsan y mëss arjunje por almanco 120 dis al ann so post de laur tla regiun y fá na trassa de passa 18 chilometri (te öna na direziun) olache al ne passa nia altamo vigni mesora n meso dl trasport publich. Le contribut é calcolé ma por le percurs che reverda le teritore dla provinzia. Danter i criters por l’assegnaziun di contribuc él la destanza danter post d'abitaziun y staziun d'architada, la combinaziun danter i orars di mesi dl trasport publich y di orars di turnus de laur, sciöche ince i tëmps de speta ai mesi dl trasport publich.
Les domandes de contribut po ma gní dades jö online tres la prozedöra a chëra che an ti röia pormez cun l’account zertifiché o cun chël nia zertifiché: clichede chilò.
L’egov-account nia zertifiché po gní damané online zënza che l'identité dla porsona o la coretëza di dac personai dá jö pois gní controlades dal’aministraziun publica. La domanda messarà porchël gní sotescrita daldô.
Da tó en conscidraziun: Sce al vëgn adoré n eGov-account nia zertifiché él da stampé, do che al é gnü stlüt jö la prozedöra online, na copia dla domanda, da la sotescrí y da ti la presenté al ofize competënt, tles formes preodüdes dales desposiziuns generales tl tëmp de presentaziun dla domanda, scenó tomera.
La domanda sotescrita ti pó gní menada al Ofize Trasport de porsones tres e-mail a chësta misciun ContributiPendolari@provincia.bz.it, tres fax al numer 0471/415499, por posta ala misciun: Ofize Trasport de porsones, Plaza Silvius Magnago 3/Palaz 3B, 39100 Balsan o dada jö personalmënter tratan chësc orar: dal lönesc al vëndres dales 9.00 ales 12.00 y la jöbia dales 8.30 ales 13.00 y dales 14.00 ales 17.30.
Por plü informaziuns: ww.provinzia.bz.it/la/sorvisc-a-z.asp?bnsv_svid=1010540
rc
