No Credit, campagna nöia cun na vitima de n inzidënt cun le motor
„Cun 17 agn â mi monn por n momënt lascé da se rodé“, á cunté Doris, che á albü n inzidënt stradal te chël che ara á pordü na iama, incö (04/04) ala presentaziun dla campagna de sensibilisaziun nöia de No Credit tl Safety Park. Doris é ince la testimonial nöia dla campagna 2016. „Por mudé i comportamënc sön strada él nezesciar de tröc agn, porchël vá No Credit inant“, insciö l’assessur Mussner.
Da söporjö 10 agn é la Provinzia de Südtirol ativa cun la campagna de sensibilisaziun „No Credit“ por aumenté la segurëza sön les strades südtirolejes. „L’obietif ê y é tres ciamó da sensibilisé dötes les porsones che se möi sön strada da se comporté te na manira responsabla“, á sotligné l’assessur por la mobilité y la rëi stradala Florian Mussner tratan la presentaziun dl’ediziun nöia dla campagna tl Safety Park a Pfatten. „Vignun che se möi sön les strades mëss avëi responsabilité por se instësc, por i passajiers y por düc i atri anuzadus dles strades – chësc messaje orunse dé inant ales porsones“, insciö Mussner. Por le pröm iade sará insciö i placac de No Credit da odëi tla provinzia vijina de Trënt. „Por arjunje plü segurëza sön les strades ne pó la campagna nia s’archité söi confins provinziai, insciö ún dé nosta desponibilité da colaboré sciöche Provinzia dl Trentin“, á dit l’assessur pro la mobilité Mauro Gilmozzi ince presënt ala conferënza stampa.
„Chësc ann ún tut na dezijiun corajosa, nöia – mo al é da dí che le coraje é chël de Doris, nosta testimonial söi placac nüs“, á dit Mussner. Insciö ne é la fotografia söi placac degöna fotomontaja, mo an vëiga la vita - la vita do n inzidënt stradal, á splighé l’assessur. Le placat nü mostra Doris, che á albü cun 17 agn n inzidënt cun le motor te chël che ara á pordü na iama. Por le pröm iade él insciö na porsona che mostra na fotografia sensibla che nes visualisëia les conseguënzes tragiches de secunt de dejatenziun cun situaziuns che pó cambié döt le percurs dla vita.
„La gran orenté da orëi fá para pro la campagna á paié la mëia sce i sun buna da antergní che atri se fejes me sön strada“, á dit la jona, che á ciafé tröpes laldes por so coraje y so engajement por la segurëza sön strada. „La braia cörta é na mia dezijiun cosciënta, por sotligné che i ne á mai plü vistí na braia cörta do l’inzidënt: implü ái tut la dezijiun da vistí cialza dai tac, deache ai é por me le simbol de na pert de femininité che i á pordü“, á splighé Doris. Cun süa aziun oress Doris ince se sporje pormez a dötes les ëres jones che ne se fej nia tröc pinsiers da se senté doia söi motors. „I me á imajiné mia vita te n’atra manira, tratan che mi cumpagns ê al mer o sö por munt messâi iö combat y azeté mi corp y tres ciamó é la cura de mia protesa n fistide“, á cunté Doris. L’assessur Mussner á sotligné süa amiraziun por le coraje de Doris che á cunté incö süa storia, por daidé i atri y por la manira sciöche ara vir süa vita cun chësc handicap.
„Ince chësc ann é la campagna de No Credit basada sön i trëi pilastri dla sensibilisaziun, di controi y dla costruziun de barieres de proteziun“, á splighé le diretur dl Departimënt por la Mobilité y la Rëi stradala Valentino Pagani. Ti ultims agn é i morc sön strada stá tres inanter i 35 y i 40 vigni ann. „Por smendrí i inzidënc ne bastel nia ma straufunghes, mosöres de sensibilisaziun y costruziuns de proteziun nöies mo ince n aumënt di controi dla velozité sön strada“, insciö Pagani.
Porchël organisëia ince chësc ann indô les forzes dl ordin controi de velozité costanc sön dötes les strades dl Südtirol. Da öna na pert gnarál sensibilisé cun aziuns mirades diretamënter sön strada, mo dal’atra pert gnarál ince fat straufunghes tres cun le fin da evité comportamënc prigorusc sön strada. Por sostigní le laur dla polizia locala á la Provinzia de Südtirol ince cumpré dui radars nüs che pó gní anuzá sön döt le teritore provinzial, dantadöt sön les trasses plü prigoroses.
I intervënc de costruziun reverda n ampliamënt dla segnaletica y dla ilominaziun dles strades, le ressanamënt de toc de strada danejá y le montaje di tlandri dles strades te posć dër da prigo. La Repartiziun Strades dla Provinzia istalëia insciö ince tlandri aposta por sconé i motoziclisć.
Tla perioda danter le 2011 y le 2013 él gnü istalé tla Provinzia indöt 9411 metri de tlander sön 125 trates dër prigoroses, 2014/15 d’atri 2630 metri te 63 trates prigoroses. Tl 2016 gnarál istalé implü 1200 metri de tlander te 15 curves prigoroses. Te döt le Südtirol él atualmënter indöt 10.600 metri de tlandri cun proteziuns spezifiches por motoziclisć, cun chëres che al é meso da mët en proteziun 142 trates prigoroses.
Un di contignüs prinzipai de No Credit é ince la colaboraziun cun le Safety Park a Pfatten, che preivëiga l’organisaziun de cursc y eserzizi de pratica metüs a jí adöm cun i Moho hotí dla zona. Ai 9 de aurí gnarál ince tigní al Safety Park la manifestaziun dl Moto Test Day, olache düc i motoziclisć pó porvé fora i motors nüs y damané consëis ai esperc dl setur.
rc
Galaria dales fotografies
Foto USP/rc
