Dala Junta: 150 posć por le sorvisc zivil volontar provinzial
Indöt 150 é i posć resservá ai jogn dai 18 ai 28 agn che ó tl 2016 fá na perioda de sorvisc zivil volontar provinzial. Les organisaziuns che é scrites ite tl register aposta é 58, la Junta provinziala á aprové incö, ai 05 de aurí, la bandida che ti consënt ales assoziaziuns y ai ënc da presenté sü proiec cina ai 10 de jügn.
Le termin por se scrí ite al register di organisadus dl sorvisc zivil volontar provinzial é tomé ai 31 de merz. Indöt él sté 58 assoziaziuns zënza fin de davagn cun sënta tl Südtirol che á presenté sües candidatöres. L’iscriziun al register provinzial é na condiziun fondamentala por rové ala secunda fasa, chëra che reverda la presentaziun di proiec: la bandida de concurs é gnüda aprovada incö, ai 5 de aurí, dala Junta provinziala cun 150 posć a desposiziun por le 2016 en confrunt ai 135 dl 2015 y ai 82 dl 2014.
„Le volontariat – á sotligné le presidënt Arno Kompatscher – é öna dles ressurses plü importantes de nosta sozieté y al é dërt da la valorisé le plü che ara vá. Cun le sorvisc provinzial zivil ti gnarál dé la poscibilité ai jogn da mët a desposiziun sües capazités y süa solidarieté por daidé porsones singules y döta la comunité.“ I volontars, che mëss avëi n’eté dai 18 ai 28 agn, ciafará na retüda dles spëises de 450 euro al mëis y ai podará chirí fora sce fá n sorvisc de 8 o de 12 mëisc. Dötadöm vëgnel damané da lauré almanco 30 ores al’edema.
Le sorvisc zivil provinzial volontar pó gní fat te chisc seturs: assistënza sanitara y soziala, reinserimënt sozial y intervënc d’emergënza, educaziun, sorvisc jogn y promoziun culturala, sconanza dl patrimone ambiental y artistich, proteziun zivila, sconanza di dërc di consumadus y di utënc, educaziun al svilup, ativités dl tëmp lëde y de educaziun sportiva. I proiec presentá gnará valutá cina ai 10 de jügn dal Ofize Afars de cabinet che fajará ince na gradatöra. I jogn messará spo contaté diretamënter i ënc y les assoziaziuns. Por plü informaziuns prëibel consulté la plata internet dl Sorvisc zivil volontar provinzial che é da ciafé sot a www.provincia.bz.it/servizi-volontari/servizio-provinciale-volontario/servizio-sociale-provinciale-volontario.asp
rc
