96 maestri dai schi y dal snowboard nüs, danter chisc ince Manuela Mölgg
Te Südtirol röiel lapró indöt 96 maestri dai schi nüs, partis sö danter schi alpin y snowboard, 3 maestri dl telemark y 15 direturs de scora dai schi: i diploms é gnü surandá incö (ai 6 de aurí) a Balsan tl contest dla Fiera ProWinter. Danter i maestri nüs ince l’atleta Manuela Mölgg y l’atlet Alex Zingerle.
I maestri dai schi é i ambasciadus dl turism da d’invern dl Südtirol y ai pita n assistënza profescionala y d’alt livel ai ghesć sön les pistes dai schi. Le livel alt dla formaziun é garantí dal’organisaziun profescionala dla Provinzia cun ince proes d’ejam. I diploms ti é gnüs surandá incö, ai 06 d’aurí, ai maestri dai schi nüs dal presidënt dla Ciamena di maestri dai schi, Claudio Zorzi, y dal diretur dl’Area funzionala Tursim dla Provinzia, Hansjörg Haller tl contest dla fiera ProWinter.
A contlujiun dl program de formaziun de trëi agn él 81 candidac che á passé l’ejame por maestri dai schi, de chisc 15 dla scuadra nazionala y 15 maestri de snowboard. Danter i diplomá él ince Manuela Mölgg, Alex Zingerle, Chiara Costazza, Luca De Aliprandini y Sigmar Klotz. I 96 candidac á messü superé dui ejams de amisciun ai cursc, na formaziun de 90 dis cun leziuns didatiches, teoretiches y pratiches, y i ejams che alda lapró.
Tl 2015 él implü ince gnü tigní n curs de cualificaziun por direturs de scores dai schi (15 diplomá), por maestri de telemark (3 maestri nüs) y dui cursc de spezialisaziun por ti insigné da jí cui schi ai mituns (25 maestri nüs). Dui aspec fondamentai dla formaziun é la segurëza y la conescënza de lingac foresć.
rc
Galaria dales fotografies
