Minister Kurz te Südtirol: Autonomia, Euregio y profugs
Le minister di afars cun l’ester Sebastian Kurz s’á incunté incö, jöbia ai 7 de aurí, sön invit dl presidënt dla Provinzia Arno Kompatscher a Balsan cun i trëi presidënc dl’Euregio. Danter l’ater él gnü traté la problematica di profugs, i controi söl confin dl Prener, le svilup dl’autonomia y la tlausola de proteziun dl’Austria.
La problematica di profugs y le management de confin dl’Austria, mo ince le svilup dl’autonomia, la reforma dla costituziun taliana y le pat de garanzia cun la Talia sciöche ince la colaboraziun cun l’Europaregiun Tirol – Südtirol – Trentin é stades les tematiches prinzipales dl’incuntada de incö (ai 07/04) dl Minister austriach por l’Europa, l’Integraziun y i Afars cun l’ester Sebastian Kurz cun i presidënc dl’Euregio Arno Kompatscher, Ugo Rossi y Günther Platter. Le minister Kurz á laldé la buna colaboraziun y le spirit d’iniziativa tl’Euregio, n model de suzes, che desmostra che „ince sce les posiziuns de start é desvalies él impó sté poscibl da porté inant, cun l’orenté da lauré adöm, valurs y propostes deboriada.“ Kurz á ince sotligné che la colaboraziun danter l’Austria y le Südtirol é dër strënta, sciöche al vëgn ince desmostré dal barat intensif d’informaziuns. Le minister austriach á ince anuzé l’ocajiun por splighé les dezijiuns dl’Austria por ciafé na soluziun ala problematica di profugs y por smendrí le numer dles porsones che röia adalerch.
Tla chestiun di profugs á le minister di afars cun l’ester damané do comprenjiun por le percurs austriach por na linitaziun dl numer di migranc che röia adalerch. „I sun tl lauré por ciafé soluziuns che alisirëies le pëis sön l’Austria, mo che ne pëses nia sön le Südtirol“, á splighé le minister Kurz recordan ince che al é atif por ciafé na soluziun europeica deboriada ai atri Stac mëmbri.
La vijita dl minister austriach á metü man incö do les 12.00 cun n’incuntada cun le presidënt dla Provinzia Arno Kompatscher por traté ince la tematica dl svilup dl’autonomia tl dagní. „I á informé le minister Kurz dl prozes de ajornamënt dl svilup dl’autonomia, ince tl contest dla reforma dla costituziun a livel statal“, á splighé le presidënt dla Provinzia Arno Kompatscher. „I ún ince rajoné dl pat de garanzia danter le Südtirol y la Talia y dles ostilités dles atres Regiuns por ci che reverda le pëis finanziar che ares mëss porté“, insciö Kompatscher.
La colaboraziun cun les regiuns vijines tl contest dl’Euregio, le svilup dla situaziun di profugs y i controi söi confins é stades les tematiches prinzipales dl’incuntada dl minister Kurz cun i trëi presidënc dl’Euregio. Sciöche presidënt de turnus dl’Euregio Tirol-Südtirol-Trentin á sotligné Ugo Rossi la solidarieté dles trëi provinzies y confermé le sostëgn dl Trentin pro la spartiziun di profugs sön döt le raiun dl’Euregio. „Nosc impëgn sará inant chël da intergní a livel statal y europeich por restabilí indô le funzionamënt plëgn dl’acordanza de Schengen“, insciö Rossi.
Le presidënt dl Land Tirol Günther Platter á sotrissé l’importanza storica dl Prener, por che le confin danter le Südtirol y le Tirol ne devëntes nia n post de emergënza. „Nosta orenté resta inant chëra da desfá confins y porchël é ince nosta ghiranza chëra da efetué les registraziuns te na manira asvelta por spartí i profugs t’Europa aladô de na logica iüsta“, insciö Platter.
Videos da desciarié:
https://we.tl/tPQg3gHzh3
rc
Galaria dales fotografies
