Tornê de hockey interladin 2016: Ampëz davagna la setima ediziun
La ediziun 2016 dl tornê de hockey danter les scores mesanes dles valades ladines é jüda a piz inier, jöbia ai 07 de aurí, a Cianacëi. Jogadus de Gherdëna, dla Val Badia, de Fodom/Alleghe, de Ampëz y de Fascia á combatü por le titul „campiun de hockey interladin 2016“. Le prömes trëi posiziuns é jüdes a Ampëz, Fascia y Gherdëna.
Dal 2010 vëgnel organisé vigni agn n tornê de hockey danter les scores mesanes de Gherdëna, dla Val Badia, de Fodom/Alleghe, de Ampëz y de Fascia. I pröms trëi agn é le tornê gnü metü da jì a Alleghe, daldô tl 2013 te Gherdëna y tl 2014 te Fascia, l’ann passé tla Val Badia y chësc ann a Cianacëi. „Le tornê de hockey é na buna ocajiun por i scolars y les scolares dles valades ladines amesa les Dolomites da s’incunté por s’imparé da conësce da plü daimpró y por renforzé le liam cultural“, á sotligné l’intendënt ladin Roland Verra che á tut pert ala premiaziun adöm cun le rapresentant dles scores mesanes de Fascia Federico Corradini y d’atres autorités locales.
Les partides é gnüdes organisades tl Stadium dla dlacia “Gianmario Scola” de Cianacëi. Vigni valada ê rapresentada al tornê cun öna na scuadra y á soghé cun dötes les scuadres dles atres valades. Le pröm post á arjunt la seleziun de Ampëz, al secundo post é rové Fascia, al terzo post la scuadra da Gherdëna, spo s'á tlassifiché cuarta la seleziun de Fodom/Alleghe y cuinta la Val Badia.
rc
Galaria dales fotografies
