Museum Ladin: Presenté le liber nü sön Catarina Lanz de Lois Craffonara
Ara é gnüda presentada en sabeda ai 16 de aurí a Al Plan de Mareo la publicaziun nöia de Lois Craffonara y de Helga Dorsch dedicada ala figöra storica de Catarina Lanz, l’eroina ladina dles batalies de liberaziun tirolejes. Le liber é gnü dé fora dal Museum Ladin y é le resultat de plü agn d’inrescides sön i aspec desvalies che reverda la „fancela ladina de Spinges“.
Inrescí la vita de Catarina Lanz, aprofondí i aspec plü desvalies dl contest sozial y storich dl’epoca storica dles batalies tirolejes cuntra i soldas franzesc-bavarejes y analisé l’importanza atuala dl’eroina storica ladina: chisc é danter l’ater i obietifs dla publicaziun nöia „Catarina Lanz. Das Mädchen von Spinges“ che é gnüda presentada en sabeda ai 16 d’aurí a Al Plan de Mareo. L'inrescida storica é gnüda realisada dai auturs y esperc de storia y cultura ladina Lois Craffonara y Helga Dorsch te plü agn y porta a löm tröpes informaziuns nöies y n'analisa storica dër prezisa dla figöra storica y dl mit de Catarina Lanz. Tratan la presentaziun á l’autur Craffonara porté dant les perts plü importantes dl liber y le diretur dl Museum Ladin Stefan Planker á ilustré la figöra de Catarina Lanz, a chëra che le Museum ti á ince dediché na mostra aposta tl 2004.
Catarina Lanz ê na fancela d’Al Plan. Dl 1797 ára combatü a Spinges cuntra les trupes franzesc-bavarejes, che â tut ite le Tirol, spo éra sparida y n‘á mai cunté ci che ara â fat. Impormó 70 dedô éson gnüs alsavëi so inom. Da dailó incá á tröpes domandes dé da laur da scrí la storia: éra veramënter esistida? Y sce sce, êl veramënter la fancela ladina? Propi a chëstes domandes ti vá do la publicaziun nöia dl Museum ladin cun de plü inrescides sön chësc personaje storich controvers.
Öna dles tematiches prinzipales dl liber é la descurida dla linia genealogica di Lanz de Al Plan, de chi che Catarina fajô pert, la scoverta dla ciasa de nasciüda dla eroina ladina y ince n’analisa dl contest familiar y sozial de öna dla protagonista plü conesciüda dla batalia de Spinges. Implü vëgnel ince a löm de plü documënc che reverda l’identité de Catarina Lanz, danter l’ater ince n aprofondimënt sön süa presënza a La Pli de Fodom, olache ara â ince vit na pert de süa vita y olache ara é morta. La publicaziun nöia ti dedichëia ince na pert dl liber ales contradiziuns storiches y al'importanza dl personaje de Catarina Lanz aldedaincö. Le liber de 560 plates y cun tröpes ilustraziuns é da ciafé tla botëga dl Museum Ladin y costa 38 euro.
Por de plü informaziuns: Museum Ladin Ciastel de Tor, strada Tor 65, San Martin de Badia, tel. 0474 524020, www.museumladin.it
rc
Galaria dales fotografies
Foto: USP/Herwig Prinoth
