Kompatscher incunta Weber: „Por n’Europa zënza confins interns“
„Les barieres ne eliminëia nia i problems, mo ares i sposta. I viun te n’Europa zënza confins interns, che á dötes les condiziuns por defëne sü prinzips che á porté ala nasciüa dl’UE“: chësta é la sintesa dla posiziun coletiva dl presidënt dla Provinzia Arno Kompatscher y dl suranstant dl Parti popolar europeich, Manfred Weber, do n’incuntada incö danmisdé (ai 18 d’aurí) tl Palaz Widmann.
La tematica di migranc, dai controi sön i confins ala politica europeica di Stac mëmbri por ci che reverda la situaziun di profugs, é stada la chestiun prinzipala dl’incuntada incö damisdé (ai 18 d’aurí) tl Palaz Widmann danter le presidënt dla Provinzia Arno Kompatscher y le suranstant dl PPE tl Parlamënt europeich, Manfred Weber. Tl’incuntada cun i jornalisć á Kompatscher y Weber sotligné che „le Prener rapresentëia le cör dl’unificaziun europeica y che al á n valur storich inestimabl por le Südtirol. Do la pröma vera mondiala él sté n simbol de spartiziun, cun l’introduziun de Schengen él indere deventé n simbol por l’eliminaziun de barieres y confins.“ Kompatscher á implü recordé che „ince sce i un comprenjiun por i gran sforc che l’Austria á fat por ti pité n’acoliënza positiva ai tröc migranc rová adalerch, é la costruziun de barieres sön le Prener n vare zoruch tla storia che ne conscidrëia nia la sensibilité dla chestiun por la popolaziun locala.“
Aspetan ince da avëi informaziuns concretes sön l’istalaziun y la dorada de controi poscibli da pert dla polizia austriaca söl Prener, cun ince conseguënzes por la zircolaziun de porsones y marcianzies, á le presidënt Kompatscher confermé che „la sora poscibilité por ciafé na soluziun ala chestiun di profugs y migranc ne é nia chëra da fá sö barieres, mo da corstruí n sistem de solidarieté europeica“. Le suranstant dl PPE Weber á sotligné l’importanza da ciafé na soluziun europeica adöm cun düc i Stac mëmbri dl’UE. Le presidënt dla Provinzia á prezisé che por evité la presënza de n numer alt de migranc sön le confin dl Prener él la Provinzia de Balsan che fej presciuns sön Roma por che la registraziun dles porsones che damana do asil vëgnes bele fata di hotspots presënc söl teritore statal por i partí sö spo sön dötes les regiuns.
Por plü informaziuns (audio y video) él poscibl da desćiarié dessot les imajes y intervistes.
Imajes incuntada Kompatscher-Weber
Audiointervistes Kompatscher y Weber
rc
Galaria dales fotografies
Foto USP/mb
