Rondel a La Ila: Ok dla Junta ales carateristiches tecniches
Por smendrí l’intensité dl trafich tl zënter de La Ila á la Junta provinziala aprové i dac tecnics por la realisaziun de n rondel al’incrujada cun San Ciascian.
Tratan les sajiuns da d’isté y da d’invern é la zircolaziun dl trafich tl paisc de La Ila gonot suraciariada cun tëmps de speta lunc che porta ince a na diminuziun dla cualité de vita por i abitanc dl paisc. „Por regolamenté damí le trafich y por alisiré le zënter dl paisc dales colones lungies de auti tles sajiuns turistiches él planifiché da realisé n rondel tl zënter dl paisc de La Ila pro l’incrujada che porta a San Ciascian“, spliga l’assessur por les strades y la mobilité Florian Mussner, che ti á presenté incö (19/04) les carateristiches tecniches dl’opera stradala ala Junta provinziala.
Al é preodü la realisaziun de n rondel che porta dala strada statala SS244 ala strada provinziala 37 diretamënter tl zënter dl paisc da La Ila al’incrujada por rové a San Ciascian. „L’investimënt complessif por realisé l’opera sará de 873.000 euro, de chisc gnará 520.000 euro investis ma por i laurs efetifs“, á splighé Mussner. Le diameter estern dl rondel sará de 32 metri y corespogn isciö ales diretives scrites dant dala Junta provinziala.
rc
