Dala Junta: antizipaziun bonus fiscal por ressanamënc de frabicac
La Junta á slarié fora le provedimënt ince a döt le 2016 y a intervënc sön les perts che vëgn adorades deboriada te n condomine.
Cina ai 30 de jügn dl 2017 pó les zitadines y i zitadins presenté la domanda por ciafé l’antizipaziun dl bonus fiscal por le ressanamënt dla pröma ciasa ai ofizi dla Repartiziun provinziala Frabiché abitatif. La Junta á amplié incö (ai 19/04) le provedimënt ince a döt le 2016 y a düc i intervënc sön les perts che vëgn adorades deboriada te n condomine.
Cun na deliberaziun dla Junta provinziala sön proposta de Christian Tommasini, assessur por le frabiché y i laurs publics, él gnü amplié le provedimënt dl 2014 dla Provinzia che â porté ite la poscibilité de ciafé l’antizipaziun dl bonus fiscal por i ressanamënc di frabicac. "Ara se trata de n provedimënt che á suzes y che funzionëia veramënter", se tol a dí l’assessur Tommasini. Chësta sort de finanziamënt ti pîta n aiüt concret ales zitadines y ai zitadins che ó restrotoré la pröma ciasa y á ince porté pro a ti dé na sbürla al’economia locala sciöche sostëgn dles pices aziëndes y de chëres mesanes dl setur dl frabiché.
Porchël é l’alisiramënt ince gnü slarié fora a döt le 2016; le Fonds de rotaziun aposta é porchël gnü doté de 15 miliuns de euro surapró che röia pro i 12 miliuns dl 2014 y i 13 miliuns dl 2015.
Do s’avëi confronté cun les perts soziales á la Junta amplié chësta sort de finanziamënt ince ales perts che an pó adoré deboriada te n frabicat. Insciö pó sëgn presenté domanda de conzesciun dl’antizipaziun dl bonus fiscal sön les restrotoraziuns ince les proprietares y i proprietars de unités imobiliares te condomini olache al vëgn fat laurs sön les perts che vëgn adorades da düc.
Le finanziamënt vëgn conzedü sön la basa de na detlaraziun dl diretur di laurs che zertifichëia la sort d’intervënt che é bele gnü fat o che gnará fat y tan che al costa o gnará a costé. La licuidaziun dl finanziamënt vëgn sotmetüda ala presentaziun dla detlaraziun dl davagn che mostra sö a tan che les detraziuns dla cuta damanades amunta y che al é gnü sotescrit n contrat d’imprëst de diesc agn zënza fic.
Sön la basa dl imprëst pó la Provinzia antizipé les detraziuns fiscales preodüdes dales normes statales (rembursamënt de diesc agn, sot forma de detraziun fiscala dala detlaraziun dl davagn, anfat al 50% di cosć albüs) oblian la porsona benefiziada a dé zoruch l’import te 10 agn. Les domandes por ciafé l’antizipaziun dl bonus fiscal che reverda les restrotoraziuns de frabicac pó gní dades jö cina ai 30 de jügn dl 2017 ti ofizi dla Repartiziun Frabiché abitatif dla Provinzia.
Le finanziamënt dl’antizipaziun dl bonus fiscal cun imprësć zënza fic, spliga l’assessur Tommasini, toma tl pachet de mosöres dla Provinzia y dl Stat por sostigní les restrotoraziuns tl setur dl frabiché; dlungia le bonus statal dl 50%, él ince da tó en conscidraziun le contribut provinzial de n iade por les restrotoraziuns y ince le model de sparagn nü por la ciasa. ("Bausparen".)
rc
