Dala Junta: Road map por le sparagn energetich
Smendrí le consum energetich y ressané le patrimone imobiliar dla Provinzia: chisc i fins dla roadmap aproada dala Junta cina al 2035.
Por ci che reverda l’efiziënza energetica á l’Uniun europeica stabilí sciöche obietif chël da smendrí le consum energetich dl 30 porcënt cina l’ann 2030. Ince la Provinzia de Südtirol é damanada da dé so contribut y á insciö metü adöm n grup de laur dal inom Energy Management. Le compit prinzipal sará chël da analisé la situaziun atuala y da stabilí les strategies por le dagní. Incö (ai 19 d’aurí) á la Junta provinziala aprové la Roadmap stabilida dal grup de laur, n percurs che prevëiga de plü aziuns: dal ressanamënt ala manutenziun, cun n’atenziun particolara por ci che reverda ince le consum energetich di anuzadus.
„Atualmënter é le consum energetich dla Provinzia, danter tuní y sëntes, de presciapüch 16mile tonelades de petröre, por na spëisa complessiva de presciapüch 16,8 miliuns de euro. Le trend di ultims agn é costant, cun na picera diminuziun dl consum energetich sciöche conseguënza di inverns manco frëic“, á splighé Tommasini. Por podëi ademplí ai standarg scric dant dal’Uniun europeica laora le Energy Management cun na roadmap che prevëiga la combinaziun de de plü mosöres da atué ti proscims vint agn. N percurs che é bele scomencé cun la Repartiziun Operes publiches che laora al ressanamënt de cater frabicac, cun investimënc de presciapüch 14 miliuns de euro: al se trata dla scora „Peter Anich“ de Balsan, dl Istitut tecnich da Bornech, dla ciasa dl sport de Balsan y dl zënter scolastich da Sanciana.
„Tl dagní él preodü da combiné i laurs de ressanamënt energetich cun i laurs de manutenziun ordinara. Deache les spëises por i ressanamënc é ince dër altes sarál nezesciar da lauré implü sön la sensibilisaziun dl anuzadú dles operes publiches“, á splighé Tommasini. La Junta provinziala á dé ince so arat positif por ci che reverda la colaboraziun dl grup Energy Management cun l’Agenzia CiasaClima y cun IDM Südtirol, sciöche ince eventualmënter cun organisaziuns privates.
rc
