Profugs: Kompatscher s’incunta cun le minister Alfano
Le presidënt Arno Kompatscher s’á incunté incö (ai 19/04) a Roma cun le minister Angelino Alfano por rajoné dles mosöres da adoté tla chestiun di migranc.
„Vigni comëmber dl’Uniun europeica é damané da contribuí por ci che reverda la gestiun di profugs che röia adalerch“, á sotligné le presidënt Kompatscher. Tratan l’incuntada incö danmisdé (ai 19 d’aurí) a Roma á le Minister di interns Angelino Alfano recordé che la Talia fajará döt le poscbil por tigní sot a control la situaziun sön le tru amesa le Mer Mediteran che é deventé le percurs prinzipal do la stlüta dla via di Balcans. N'atra prezisaziun de Alfano é ince stada che la Talia tolará seriamënter les ghiranzes südtirolejes da registré les porsones che damana do asil canche ares röia adalerch sön le teritore statal.
„Le Minister Alfano á splighé che i hotspots ará ince döta l’atrezadöra nezesciara. Sce la Talia fajará süa pert te na manira efiziënta sará chël ince n impuls por i atri paisc da garantí na spartiziun valia sön düc i Stac comëmbri sciöche stabilí dala UE“, á recordé Komatscher che á prezisé inant che i dui obietifs prinzipai resta chi da ciafé na soluziun unitara por mët en segurëza i confins esterns dl’UE y da mené aiüc umanitars ti Stac de provegnënza di profugs.
Al’incuntada cun le minister Alfano y le presidënt Komaptscher a Roma ál ince tut pert le suranstant dl PPE Manfred Weber. Düc trëi i partezipanc é stá a öna che „al é nezesciar da svilupé n plann europeich por ciafé n’acordanza azentabla cun la Libia“. Le minister Alfano, che incuntará tosc ince le minister di afars interns dla Libia, á dit de al gnará ince en vijita a Balsan por desmostré süa vijinanza ala posiziun dl Südtirol por ci che reverda l’anunzia de controi poscibli söl confin dl Prener.
rc
