D’isté laurs sön la ferata de Puster: corieres de sostituziun
Dai 20 de jügn ai 24 de lugio sará la linia dla ferata danter Bornech y Sanciana sospenüda. Al vëgn garantí n sorvisc de sostituziun.
Na seria lungia de laurs de manutenziun straordinars mëss gní fac dala sozieté de gestiun dla rëi feroviara RFI ciamó chësc ann sön la linia feroviara danter Bornech y Sanciana. I laurs reverda les scines, la strotöra feroviara y les linies eletriches. Implü vëgnel ince scemplifiché les istalaziuns tecniches. Dai 20 de jügn cina ai 24 de lugio sará la linia dla ferata danter Bornech y Sanciana porchël chita. La Junta provinziala á insciö aprové inier, ai 19 d’aurí, sön proposta dl assessur por la mobilité Florian Mussner da organisé sorvisc de sostituziun.
„I ún ciafé n’acordanza cun RFI che al vëgnes lauré tratan la perioda dles vacanzes da d’isté por che i scolars y en pert ince pendolars ne sides nia atocá dai laurs“, insciö l’assessur por la mobilité Florian Mussner. Dai 20 ai 29 de má gnarál fat laurs, ma de nöt, sön la trata danter Bornech y Sanciana. Tratan le de sarál garantí le sorvisc te na manira regolara. D’atri laurs ma de nöt gnará fac dai 27 de lugio ai 7 de agost sön la linia Bornech – Ehrenburg.
Por indöt 35 dis mëss indere la trata gní sarada tresfora danter Sanciana y Bornech dai 20 de jügn ai 24 de lugio. „Te chësta perioda gnarál garantí n sorvisc de sostituziun cun corieres, le medemo sorvisc che á bele funzioné bun tratan i laurs de ressanamënt dla linia dla Val de Puster dal 2008 al 2009. I orars dl sorvisc de sostituziun vëgn laurá fora dötaurela y gnará regolamentá aladô dles ghiranzes di zitadins“, insciö Mussner. Apëna che i orars é definitifs, gnarál ince informé i zitadins.
rc
