Dala Junta: contribuc por mosöres de sostëgn a bëgn dl’economia
La Junta provinziala á ajorné incö (ai 26 d’aurí) i criters de conzesciun di contribuc a bëgn dles assoziaziuns de categoria y dles organisaziuns.
La revijiun di criters reverda i contribuc por scomenciadies che porta a n aumënt dla produtivité dles assoziaziuns de categoria y dles organisaziuns. La Junta provinziala á insciö ajorné les leges provinziales spezifiches dl 1973 y dl 1997 cun integraziuns nezesciares por adaté la normativa ales desposiziuns europeiches nöies.
I contribuc pó gní conzedüs a condiziun che ai ne sides nia aiüc de Stat, sciöche preodü dala normativa europeica. Le sostëgn finanziar ti vá a bëgn de assoziaziuns de categoria, de cooperatives y di istituc, ënc y organisaziuns che se dá jö cun sües ativités dantadöt tl Südtirol. Les scomenciadies ametüdes al contribut mëss gní planificades cun l’obietif da aumenté la produtivité de n setur economich en general o de n’area geografica y nia de na singula impresa.
Les mosöres de sostëgn é ince preodüdes por l’organisaziun de na partezipaziun deboriada a na fiera o l’organisaziun de scomenciadies de ajornamënt y consulënza por de plü impreses. I contribuc fej referimënt ai proiec d’ajornamënt y de spezialisaziun tl setur dl artejanat, dl’industria, dl comerz, di sorvisc y dl turism, adöm ince cun les scomenciadies de promoziun dl’inovaziun y dl setur dles cooperatives. Al é ametüs y ametüdes al finanziamënt ince inrescides, analises, stüdi y proiec de svilup, sciöche ince scomenciadies de marketing y campagnes de promoziun.
Por avëi azes al contribut mëss dötes les scomenciades preodëi na spëisa minima de almanco 2mile euro. Les domandes mëss gní presentades cina ai 31 d’otober. Le budget preodü dala Provinzia por chisc contribuc de promoziun dl’economia ne vëgn nia mudé y resta de 4 miliuns de euro.
rc
