Dala Junta: Energy Manager dla Provinzia, nominé Daniel Bedin
Le diretur dl Ofize Manutenziun frabiches publiches Daniel Bedin é gnü nominé sciöche Energy Manager dla Provinzia.
Smendrí le consum energetich y l’impat ambiental y recualifiché le patrimone imobiliar: chisc é i obietifs prinzipai dl grup de laur Energy Management che á presenté l’edema da denant ala Junta provinziala n raport anual y na planificaziun prezisa por i intervënc preodüs ti poscims agn. La documentaziun é gnüda realisada en colaboraziun cun l’Istitut por l’energia renovabla dl EURAC. Incö, en mertesc ai 26 d’aurí, é l’inciaria de Energy Manager dla Provinzia gnüda aprovada dala Junta cun la nomina de Daniel Bedin, atualmënter le diretur dl Ofize provinzial Manutenziun frabiches publiches.
Le Energy Manager ará le compit da coordiné le proiet por arjunje i obietifs europeics ince tres la colaboraziun cun l’Agenzia CiasaClima y IDM Südtirol Alto Adige. Por ci che reverda l’efiziënza energetica á l’Uniun Europeica stabilí sciöche obietif le smendrimënt dl consum energetich dl 30 porcënt cina l’ann 2030. Trëi les mosöres planificades: la recualificaziun energetica di frabicac, intervënc de manutenziun y scomenciadies de sensibilisaziun che dess porté a n comportamënt plü eifiziënt da pert di anuzadus.
rc
