Firmé le protocol d’acordanza danter l’ANPI y la Provinzia
Le vizepresidënt dla Provinzia Christian Tommasini y le presidënt dl’ANPI Orfeo Donatini á firmé incö (28/04) le protocol d’acordanza cun l’ANPI.
Ince l’Intendëntza ladina sará ala pert, adöm a chëra todëscia y taliana, pro la colaboraziun cun l’ANPI, l’Assoziaziun nazionala di partejans, por amplié la conescënza di avenimënc storics tratan la perioda danter le 1919 y le 1948 tles scores dla Provinzia. Do l’aprovaziun da püch da pert dla Junta provinziala á l’assessur por la cultura y scora taliana Christian Tommasini y le presidënt dl ANPI, Orfeo Donaitni, firmé incö (28/04) le protocol d’acordanza cun les trëi Intendënzes ladina, taliana y todëscia. Tla premissa dl protocol d’acordanza él gnü inserí che l’ ANPI dl Südtirol y i Departimënc Istruziun y formaziun á a öna cun i valurs dla democrazia che é fondá sön la Resistënza y la scombatüda dla Liberaziun dal fascism. Implü vëgnel ince sostigní, tres l'acordanza, la cultura dla cosciënza storica y zivila democratica, i valurs dla convivënza, dla toleranza y dla solidarieté y la destribuziun dles conescënzes di avenimënc storics dl scombatimënt dl movimënt dla Liberaziun cuntri i fascisć y nazisć.
Do la firma dl’acordanza á le vizepresidënt Christian Tommasini sotligné che „por merit de chësc protocol cun l’ANPI sarál poscibl da renforzé ciamó deplü la colaboraziun por promöie tles scores i valurs dla democrazia y dla liberté che é ince i pilastri de nosta Costituziun“. Ince por le presidënt dl’ANPI, Orfeo Donatini, rapresentëia la sotescriziun n ater vare important por „fá conësce ciamó deplü i valurs dla Costituziun republicana y i ideals dla democrazia, liberté, solidarieté y dl pluralism cultural che é obietifs particolars ince te chësta fasa storica.“
Les scores y l’ANPI laurará insciö te na manira mirada danter l’ater sön les tematiches che reverda la perioda danter le 1922 y le 1945, cun n’atenziun particolara ales formes de resistënza zivila che é gnüdes praticades dala popolaziun. Le protocol prevëiga de plü scomenciadies de recort y de analisa di valurs fondamentai dla Costituziun taliana.
Chëstes é n valgönes dles scomenciadies planificades: ti pité ai scolars/ales scolares contignüs y materiai de cualité por l’aprendimënt dles materies storiches, svilupé stromënc didatics che conzed ince l’adoranza di social media y de internet, promöie le barat cultrual tres seminars y conferënzes y realisé material d’informaziun por studënc y insegnanc. Por la realisaziun de chëstes mosöres didatiches gnarál istituí n Comité tecnich-scientifich cun rapresentanc dles Intendënzes, dl’ANPI y cun consulënc y esperc.
rc
