Dala Junta: operes stradales, 265 miliuns de investimënc te 3 agn
Löm vërda dala Junta provinziala al program trienal dla Repartiziun Infrastrotöres. Intervënc por 265 miliuns, tosc l'apalt por l'entrada tla Val Badia.
Al é de 265 miliuns de euro le budget preodü por la planificaziun y realisaziun dles operes sön les strades statales y provinziales tl Südtirol dl Südtirol. Calcolá lapró pro chësta zifra, che vëgn spartida sö te trëi agn, él ince i 90 miliuns de euro preodüs por le bilanz 2016, che sará 89 por le 2017 y 86 por le 2018. Aladô dl assessur competënt Florian Mussner é „un di punc prinzipai dl program la realisaziun dles zirconvalaziuns, n setur de importanza strategica che nes consënt de sposté le trafich fora dai zëntri di paisc y por ti garantí insciö na maiú cualité de vita ai residënc“.
Danter les operes prinzipales, olache al é preodü la publicaziun dla gara d’apalt cina la fin dl ann, él la strada d’azes tla Val Badia (68 miliuns), la zirconvalaziun de Maran (146 miliuns) y la sortida „zënter“ a Porsenú (14 miliuns). Tres por ci che reverda les zirconvalaziuns á l’assessur Mussner splighé che „tartan la proscima edema él sön le program n’incuntada cun i suranstanc de A22 por traté la chestiun de Balsan. Le plann trienal aprové dala Junta prevëiga le mëteman tosc dla fasa de proietaziun.“
„La cosa stabilida – insciö le presidënt Arno Kompatscher – é che les ressurses por le finanziamënt dl’opera é sigüdes y che sará de 200 miliuns de euro, de chisc gnará 120 miliuns dal A22 tl contest dl renovamënt dla conzesciun dl’autostrada. Por i 80 miliuns che resta á la Provinzia tut la dezijiun da tó sö n fit y i sun ince tl planifiché na colaboraziun cun l’A22 por ci che reverda la proietaziun y la realisaziun dla zirconvalaziun de Balsan. I tëmps? Por n’opera de chëstes dimenjiuns él preodü na dorada de 10 agn.“
I tecnics dla Repartiziun Infrastrotöres á implü elaboré na lista de priorités por ti dé plü importanza ai intervënc de prescia sön les strades provinziales y statales. „Döt le program é partí sö te trëi arees, öna de chëstes é i tuní, cun n’atenziun particolara ai implanc d’ilominaziun por garantí n maiú sparagn energetich. N ater setur é le ressanamënt di punc y spo la metüda en segurëza de n valgönes strades che é en prigo por la tomada de peres, sciöche por ejëmpl sön la statala dl Ju dla Mendola o dla strada provinziala por la Val Senales“, insciö l’assessur Mussner. Cina la fin dl 2016 gnarál assegné gares por 20 operes, atres 28 tl 2017 y indöt 16 por l’ann 2018.
rc
