Dala Junta: furnadoia de San Senese, degöna proietaziun
Sön la furnadoia de San Senese ne él mai gnü debatü de cosć o proiec, mo ma de idees sön co mioré l’implant. Chësta la posiziun dl presidënt Kompatscher.
Tratan la conferënza stampa á le presidënt dla Provinzia Arno Kompatscher tut posiziun sön les polemiches che reverda la furnadoia de San Jenese cun l’obietif da stlarí la chestiun. „I sotlignëi ciamó n iade che tla Junta provinziala ne é mai gnü rajoné de proietaziun, de cosć, de finanziamënc, mo ma de idees sön variantes poscibles por mioré l’efiziënza dl implant portamunt“, á splighé Kompatscher. Insciö ne á la Junta gnanca tut degöna dezijiun sön na trata poscibla o sön le spostamënt dla staziun a val tl vers dl zënter dla cité, insciö Kompatscher. „Söi media él gnü publicá plü rendering che á spordü na pert dla popolaziun, ci che é ince da capí“, á dit Kompatscher.
Le presidënt dla Provinzia á implü sotligné che „vigni vare gnará fat en acordanza cun les döes aministraziuns comunales de Balsan y de San Senese adöm cun döta la popolaziun. Al se trata de analisé la fatibilité de plü ipotejes y ciaré cai che é i pro y i cuntra. Nosc obietif é chël da fá che la furnadoia de San Senese sides n implant che respognes bun ales esigënzes de pendolars, escurscionisć y ghesć, mo dantadöt ince por ci che reverda la sostenibilité, sides ambientala co economica“.
rc
