Frabiché y Abité por la jonëza ladina: trëi sëres d’informaziun
La Consulta di Jogn ladina organisëia trëi sëres d’informaziun sön la chestiun dl Abité. La pröma ai 13/05 a Urtijëi, spo a La Ila (20/05) y Al Plan (27/05).
En colaboraziun cun i Sorvisc ai Jogn dla Val Badia, Nëus Jëuni Gherdëina organisëia la Consulta di Jogn ladina plü sëres de informaziun sön la chestiun che reverda i jogn y l’abité. Domandes, consëis y propostes sará la basa dles incuntades cun chëres che la Consulta oress inrescí la situaziun dl abité por i jogn dles valades ladines, mo ince mostré sö les poscibilités presëntes bele dötaurela de sostëgn pro la cumpra o la costruziun de na pröma ciasa por la jonëza. Düc i interessá é inviá a tó pert ales sëres de discusciun, la pröma ará le titul "Frabiché y abité por la jonëza te Gherdëina" y gnará tignida
en vëndres, ai 13 de ma dl 2016
dales 20.00
tla sënta dl Zënter di Jogn „SAUT“
a Urtijëi
en presënza dl assessur por i jogn Florian Mussner. La tematica prinzipala sará le "Sparagn Ciasa" cun dui referac de Ralph Winkler, responsabl dl setur Gestiun tliënc de Pensplan Centrum AG sön la tematica „Sparagn Ciasa“ y de Manuela Paulmichl, direturia dl Ofize provinzial Svilup dla cooperaziun sön la tematica Cohousing: Cares é pa les poscibilités tl Südtirol? L'interaziun cun i jogn sará spo damanada pro la discusciun cun l'architëta y rapresentanta di Comuns de Gherdëina Nadia Mororder.
Döes sëres d'informaziun ince tla Val Badia: öna a La Ila y l'atra a Al Plan de Mareo. Le titul dles sëres é "Frabiché y abité ti Comuns dla Val Badia".
La secunda sëra d’informaziun gnará tignida
en vëndres, ai 20 de ma dl 2016
dales 20.00
tla sënta dl Zënter di Jogn „SaJ.uN“
a La Ila
cun daimpröma n referat dl ombolt da San Martin Heinz Videsott sön la tematica „Abité y Comuns“ y spo cun le referat de de Manuela Paulmichl, direturia dl Ofize provinzial Svilup dla cooperaziun sön la tematica Cohousing: cares é pa les poscibilités tl Südtirol? Spo él sön le program na discusciun. I jogn á la poscibilité da s'la cunté y dandaldöt se confronté cun i ombolc y i assessurs.
La terza sëra d’informaziun gnará tignida
en vëndres ai 27 de ma dl 2016
dales 20.00
tla sënta dl Salf dla Cassa Raiffeisen
a Al Plan
cun daimpröma n referat de Thomas Walder dla Direziun de Pensplan Centrum sön la tematica dl „Sparagn Ciasa“ y spo cun n referat di esperc dla Cassa Raiffeisen Thomas Pescollderung y Manfred Vanzi sön la tematica „Finanziamënt Ciasa“. Düc i partezipanc ará spo la poscibilité da fá domandes tratan na discusciun cun düc i reladus.
Dui sará i aspec che gnará analisá a funz: da öna na pert la documentaziun dla situaziun tl setur dl frabiché por i jogn tles valades ladines por ti presenté spo la tematica ai assessurs competënc (dantadöt ince en programaziun dla lege nöia sön le frabiché alisiré) y dal'atra pert manifestaziuns de informaziun tles valades ladines por sensibilisé i jogn sön i programs de sostëgn (dantadöt le proiet "Sparagn Ciasa/Bausparen") por la cumpra y la costruziun de na pröma ciasa. Les sëres vëgn metüdes a jí cun l'aiüt dla Pensplan Centrum AG, dl Ofize Provinzial Svilup dla cooperaziun y dla cassa Raiffeisen.
rc
