Lites comunales, apel da jí a lité dl presidënt Kompatscher
Lites comunales a Balsan, Schluderns, Niederdorf y Freienfeld en domënia, ai 8 de ma. Kompatscher recorda l’importanza da anuzé le dërt fondamental dla lita.
En domënia, ai 8 de ma, é les zitadines y i zitadins de Balsan, Schluderns, Niederdorf y Freienfeld damanades y damaná da jí a lité l’ombolt y da renové le Consëi comunal. Le presidënt dla Provinzia Arno Kompatscher fej n apel da jí a lité: „Al se trata de n dërt fondamental, chi che ne vá nia a lité ne sá nia tan de porsones che se dejidrëia chësta poscibilité. Al se trata da tó pert ala dezijiuns sön chi che ará le podëi tl Comun de residënza, na dezijiun che an ne ti pó nia lascé a d’atri“, insciö Kompatscher.
Te chësc contest fej le presidënt dla Provinzia ince referimënt ala esperiënza personala che l’á odü tröc agn manajé n Comun. „I compic y les poscibilités da dé so contribut é dër tröpes, sciöche pro ejëmpl tl setur sozial y pro chestiuns ambientales, urbanistiches, fiscales y dl’edilizia. Al ne é degun post olache le contat danter politica y zitadins é tan diret sciöche al intern di Comuns, ince deache les dezijiuns tutes dai Consëis comunai á efec concrec sön la vita da vigni de“, recorda Kompatscher.
Aladô dl presidënt dla Provinzia, „sará la legitimaziun dles aziuns de chi che á ciafé les usc plü grana sce plü porsones jará ala lita. Dantadöt te Comuns olache al é gnü a se le dé problems de governabilité. I ti feji mies aodanzes ales zitadines y ai zitadins de Balsan, Schluderns, Niederdorf y Freienfeld da avëi tosc indô na strotöra governativa cun porsones litades diretamënter dala popolaziun y porchël feji ince n apel: jide a lité, a dé jö ostes preferënzes por les candidates y i candidac che é do osc arat plü adatá da realisé le bëgn comunal.“
rc
