Dolomites UNESCO: indoman vá la presidënza südtiroleja a piz
Indoman, vëndres ai 13 de ma, jará a piz le mandat dl assessur Richard Theiner sciöche presidënt dla Fondaziun Dolomites UNESCO.
Aladô de n prinzip alfabetich prevëiga le Statut dla Fondaziun na rotaziun dla presidënza vigni trëi agn danter les Provinzies che fej pert dl teritore dles Dolomites patrimone UNESCO. Tl 2013 ti ê insciö jüda la presidënza ala Provinzia de Balsan do da chëra de Belun. „Ti ultims trëi agn unse lauré cotan y i sun insciö arjigná ca al’ispeziun dl’UNESCO preodüda por l’altonn dl 2016“, sotlignëia le presidënt dla Fondaziun y assessur provinzial por l’ambiënt Richard Theiner. Les premisses por respeté les prescriziuns scrites dant dal’UNESCO é gnüdes tignides ite dötes. Öna de chëstes reverda la strategia de gestiun dl raiun dles Dolomites che prevëiga n turism sostenibl y na mobilité de sconanza ambientala. „La strategia de gestiun y dl turism é gnüda elaborada tres n prozes de partezipaziun y ara é gnüda aprovada de dezëmber dl 2015 dal Consëi dla Fondaziun. Al é dessigü le travert plü important dla presidënza südtiroleja“, insciö Theiner.
La strategia reverda cater tematiches che contëgn de plü obietifs y mosöres concretes: la tematica „patrimone“ che se fistidëia dla sconanza ativa dles particolarités dl paesaje y dla geologia dl’area dolomitica. La tematica „esperiënza“ á indere l’obietif da mioré la gestiun di vijitadus y la promoziun de na mobilité sostenibla. Cun la tematica „comunité“ ón indere promöie la conescënza dla popolaziun locala sön la tematica dl’UNESCO y renforzé le barat cultural valorisan ince i produc locai. La cuarta tematica reverda indere le „sistem“ cun le coordinamënt y la metüda en rëi dles ativités y dla colaboraziun danter les istituziuns interessades. „Por le dagní sará nüsc obietifs la proibiziun de arees da jí cui schi nöies tl raiun UNESCO, la zertificaziun ambientala por les impreses turistiches y mosöres por atué na mobilité sostenibla tles Dolomites“, insciö le presidënt Theiner. Bele realisada é la plataforma digitala por döt le raiun dolomitich por le trasport publich y al vëgn ince bele lauré da plü tëmp por ciafé na soluziun ala chestiun dl trafich söi jus dles Dolomites.
I contignüs y obietifs dla strategia de gestiun dl patrimoe Dolomites – partí sö sön cinch Provinzies y trëi lingac – é gnüs presentá dal assessur Theiner tl mëis de merz ai responsabls dl’UNESCO a Roma y a Paris. La presidënza dla Fondaziun passará da indoman al’assessuria regionala por les infrastrotöres y le teritore dl Friul-Aunejia-Iulia Mariagrazia Santoro, che ará sciöche vizepresidënt Mauro Gilmozzi, assessur por les infrastrotöres y l’ambiënt dla Provinzia de Trënt.
rc
Galaria dales fotografies
Foto: Fondaziun UNESCO
