Cun la Fondaziun Golser por l’archirida cuntra le Parkinson
Le presidënt Kompatscher sostëgn la scomenciadia dla Fondaziun dedicada al vësco Karl Golser che promöii l’archirida cuntra le Parkinson.
Tratan n’incuntada tl Palaz Widmann ti él gnü presenté al presidënt dla Provinzia Arno Kompatscher – mëmber y protetur dla Fondaziun – le codejel nü sön la „Fondaziun dl Vësco Mons. Karl Golser“ dal professur Gregor Wenning, presidënt dla Fondaziun y dala componënta dl Consëi dla Fondaziun Inga Hosp. Le codejel contëgn i obietifs dles istituziuns y les modalités de sostëgn. La Fondaziun é gnüda costituida tl ann 2015 por ti pité ai amará de formes de parkinson nia tipiches, sciöche le vësco emerité Karl Golser, informaziuns ütles sön la cura. N ater obietif é ince chël da sostigní l’archirida scientifica sön les formes desvalies dla maratia y dles terapies.
Da vint agn él ince gnü istituí al’Université de Desproch n zënter de neurobiologia, cun a cé atualmënter le professur Wenning, che fej archirida sön les formes tipiches dl Parkinson. La Fondaziun Golser ó ince intergní por amplié l’inrescida por ci che reverda cater formes de parkinson atipiches, che ne vëgn nia studiades te na manira adatada dales ciases de produziun de medejines. La creaziun de n stipendium por studié plü a funz chësta tematica é en planificaziun.
Le presidënt Kompatscher á assiguré che la Junta provinziala ti jará a funz ala domanda dla Fondaziun Golser por favorí l’istituziun de chësta sort de stipendiums. „L’archirida sön les maraties atipiches é na sbürla importanta por sensibilisé l’atenziun sön les maraties de Parkinson. Implü él ince n sëgn de sostëgn tl vers dl vësco Golser, na personalité dër arpijiada y ezelënta“, á dit Kompatscher. Le presidënt á ince rengrazié i mëmbri dla Fondaziun por so impëgn „che é n sëgn de testimonianza conreta de solidarieté“. Tl Südtirol é i amará de Parkinson zirca duimile, 200 de chisc é atocá da formes de maratia atipiches.
rc
