Abo+, bele poscibl da fá domanda
Al é bele poscibl da fá domanda da sëgn por renové l’Abo+ por le proscim ann scolastich.
La novité plü grana por le proscim ann reverda i lerneri sot ai 18 agn che messará „ma plü paié na cuota anuala de 20 euro por l’abonamënt ai mesi dl trasport publich por un n ann“, spliga l’assessur provinzial por la mobilité Florian Mussner. Atualmënter él zirca 80mile i scolars y i studënc che s’anüza dla cherta che consënt da adoré düc i mesi dl trasport publich integré cun ma 20 euro al ann (150 por i chi che frecuentëia n’université o che fej n lernerat). Por düc chi che ó fá domanda o renové l’Abo+ dan les vacanzes da d’isté pó le fá bele da sëfn online tres la plata internet www.mobilitaaltoadige.info, olache an pó ince ciafé dötes les indicaziuns che reverda le renovamënt dla cherta.
I abonamënc atuai resta varënc cina ai 15 de setëmber dl 2016. Por fá domanda online él nezesciar di dac personai, dl codesc fiscal de chi che á o de chi che fej l’Abo+ (sce al reverda mituns y mitans sot ai 18 agn), le numer dla cherta atuala y l’inom dla scora. Düc chi che fej l’iscriziun por le pröm iade mëss ince ciarié sön la plataforma digitala na copia dla cherta d’identité. Le paiamënt di 20 euro pó gní fat tres cherta de credit, homebanking o contanc pro les portines autorisades mostran l’Abo+. Implü él ince poscibl da pié tres SEPA Direct Debit sön le cunt bancar personal. Por plü informaziuns pon ciaré do chiló.
rc
