Dala Junta: convenziuns por cuartiers por studënc tl’Austria
Por alisiré i stüdi al’Université tl’Austria á la Junta provinziala definí incö i contignüs dles convenziuns da firmé por 290 posć te ciases di studënc.
La Junta provinziala pó firmé convenziuns ince aldinfora dl teritore statal te Paisc dl’area culturala todëscia por ti garantí ai studënc y ales studëntes dl Südtirol n valgügn cuartiers te ciases di studënc austriaches. Le prisc por l’afit y les spëises che röia lapró mëss gní sostignides dai studënc instësc.
Aladô di dac ASTAT á studié indöt 5.167 studënc dl Südtirol tratan l’ann academich 2013/14 te Universités austriaches: de chisc á frecuenté 63,4 porcënt l’Université a Desproch, 26,2 porcënt á studié a Viena y i 10,5 porcënt che resta a Graz, Salzburg, Linz y Leoben.
Ince sön la basa de chësta inrescida á la Junta provinziala tut la dezijiun da jí inant cun chësc percurs de sostëgn formatif di jogn südtirolej cun l’aprovaziun de convenziuns spezifiches: al é preodü da resservé 80 cuartiers tles ciases di studënc a Desproch y n numer de 210 cuartiers te d’atres ciases destenüdes fora sön d’atres cités austriaches. Les convenziuns ará na dorada de 10 agn y piará ia cun l'ann academich 2016/17.
Les ofertes presentades ala Provinzia gnará ejaminades sön la basa de n valgönes carateristiches che reverda danter l’ater: la destanza dla ciasa dala sënta dl’Université (a Viena nia plü dalunc de 7 chiometri, a Desproch de 3 chilometri), le numer de studënc südtirolej che á viüt tla strotöra ti ultims trëi agn, la relevanza publica dl manajadú dl frabicat y le prisc a miú marcé.
I standarg minimai dles strotöres prevëiga na ciamena singula o al mascimo na dopla, na ciasadafüch te ciamena o al mascimo tla medema alzada, n azes internet dala ciamena. La Junta á stabilí che le cost plü alt por un n post é de 550 euro al’ann por na spëisa complessiva de indöt 1,754 miliuns de euro por i proscims diesc agn.
rc
