Dala Junta: criters nüs por i contribuc al sport
Löm vërda dala Junta provinziala ai criters nüs por la conzesciun de contribuc tl setur dl sport. Tl 2016 n sostëgn spezial al palé a man y ala mountain bike.
La Junta provinziala á aprové incö (ai 17 de ma) i criters nüs che regolamentëia i contribuc tl setur dl sport y dl tëmp lëde. En confrunt ai agn passá él gnü inserí n valgönes mudaziuns tecniches, spliga l’assessuria por le sport Martha Stocker che é contënta dl resultat arjunt ti ultims mëisc. „I sun stá bugn da ti garantí a dötes les assoziaziuns ince por le 2016 i medemi fonds sciöche tl 2015. Implü él ince sté poscibl da amplié i contribuc te n valgügn seturs, sicöche pro ejëmpl por ci che reverda le badminton, le palé a man, les mountain bike y le ping pong“, á dit l’assessuria Stocker.
Implü á l’assessuria Stocker prezisé che al é sté meso da ciafé na soluziun ince por les organisaziuns profescionales, che é gnüdes inserides pro chëres che á le dërt da ciafé sovenziuns, y che les domandes por la costruziun de implanc sportifs co-finanziá dal CONI pó gní emanades döt l’ann zënza tomades de termins. Öna dles novités é ince che les domandes messará gní dades jö tl dagní cina ai 31 de merz (atualmënter él le 31 de jügn) cun n valgünes mudaziuns ince por ci che reverda i aspec finanziars y de burocrazia.
Por les disciplines tlamandes „mëndres“ é le sostëgn finanziar plü alt poscibl gnü alzé da 7.500 euro a 15mile euro, por i cursc de formaziun él preodü la conzesciun de contribuc ma sce la spëisa é plü alta de 5mile euro y sce l’oferta reverda döt le teritore provinzial. Implü él ince gnü alzé la prozentuala dles antizipaziuns söi contribuc dal 50 al 70 porcënt dla soma complessiva y al é düc che pó fá domanda (cina sëgn ê la domanda limitada a düc chi che ciafâ almanco mile euro).
rc
