Dala Junta: zirconvalaziun de Chienes, ok al proiet mudé
Löm vërda dala Junta provinziala ala trassa nöia dla zirconvalaziun de Chienes. Ara sará plü lungia, mo zënza variaziuns di cosć (53 miliuns).
Le proiet dla zirconvalaziun nöia de Chienes, tla Val de Puster, é sté un di temesc tratá incö (ai 17 de ma) tratan la sentada dla Junta provinziala. Sön proposta dl assessur Florian Mussner á la Junta insciö dé süa aprovaziun ala mudaziun dles carateristiches tecniches dl proiet, che reverda en sostanza la trassa stradala. La mudaziun plü grana é insciö la lunghëza dla zirconvalaziun de Chienes che é gnüda ampliada da 2 chilometri a 2,7 chilometri: döt chësc deache al é gnü preodü n ampliamënt dla strada söla pert a vest tla direziun de Bornech. „A chësta manira él meso da regolamenté damí l’azes ala zona industriala, olache al é ince preodü da pert dl Comun de plü intervënc“, spliga l’assessur Mussner.
L’aumënt dla spëisa por ci che reverda l’ampliamënt dla strada vëgn smendrí dales spëises mëndres por la costruziun dl tunel, che sará plü cört: tres la planificaziun nöia sará la lunghëza dl tunel de 950 metri cun n gran smendrimënt di cosć por ci che reverda sides l’istalaziun co la manutenziun dl’opera. „De conseguënza ne él nia preodü variaziuns ai cosć complessifs dl’opera che sará de söporjö 53 miliuns de euro“, insciö Mussner. La gara por l’assegnaziun di laurs dess gní stlüta jö cina l’ann 2018, le scomenciamënt cun i laurs é preodü spo por l’ann dedo.
rc
