Dala Junta: aprovaziun dl ddl „omnibus“
La Junta provinziala á aprové incö le dessëgn de lege „omnibus“ che müda na seria de normes provinziales.
Dai ënc locai ala cultura, dal personal al ambiënt, dal’urbanistica al’agricoltöra, dala mobilité al frabiché abitatif y al bilanz. Al é tröc i seturs interessá dala lege omnibus (la secunda y ultima do chëra bele aproada che reverda la sanité y le sozial) che é gnüda aproada incö (ai 17 de ma) dala Junta provinziala. La proposta de lege jará sëgn inant al Consëi provinzial. Le dessëgn de lege é partí sö te cater capitui, á recordé le presidënt Arno Kompatscher do la sentada, aladô dles competënzes dles comisciuns legislatives.
Le ddl contëgn de plü adatamënc ales normes europeiches, scemplificaziuns y abrogaziuns de n valgönes desposiziuns. N valgönes mudaziuns importantes é gnüdes fates tla materia di apalc publics che reverda ince l’atuaziun aproada l’edema da denant dal Consëi di Ministri che scrii dant che la Provinzia pó regolamenté cun na lege provinziala le prozedimënt dla conzesicun di apalc publics dala esecuziun al contrat, sides por ci che reverda i laurs publics co por prestaziuns de sorvisc, tignin tres cunt dles diretives europeiches.
Na novité importanta é ince la mudaziun che dij che la Provinzia costistuësc n marcé eletronich autonom, de chël che les Aministraziuns podará fá anuzamënt impede dl MEPA (Marcé eletronich dl’aministraziun publica), manajé dla CONSIP a livel statal por la cumpra de bëgns y sorvisc sot le tët europeich da pert de fornidus reconesciüs. Al se trata de n vare che ti alisirëia l’azes ales impreses piceres y chëres mesanes al sistem di apalc publics y che favorisëia insciö la fiscalité (entrades tributaries) locala.
rc
