Frabiché y abité te Gherdëna: Gran l’interes dla jonëza
Le frabiché y abité te Gherdëna é sté tl zénter de na sëra d'informaziun ai 13/05 a Urtijëi. Ai 20/05 él preodü la proscima a La Ila y ai 27/05 a Al Plan.
Na gran pert dla jonëza s’aoda da podëi frabiché y abité ti Comuns de residënza y insciö ne él nia sté de morvëia che tröc jogn y tröpes jones dl post á tut pert ala sëra d’informaziun "Frabiché y abité por la jonëza te Gherdëina" tignida en vëndres, ai 13 de ma, tla sënta dl Zënter di Jogn „SAUT“ a Urtijëi. La sëra é gnüda organisada dala Consulta di jogn ladina en colaboraziun cun „Nëus Jënui Gherdëina“.
Dui é i aspec fondamentai che á fat da cornisc al’incuntada: da öna na pert la documentaziun dla situaziun tl setur dl frabiché por i jogn tles valades ladines por ti presenté spo la tematica ai assessurs competënc (dantadöt ince en programaziun dla lege nöia sön le frabiché alisiré) y dal'atra pert manifestaziuns de informaziun tles valades ladines por sensibilisé i jogn sön i programs de sostëgn (dantadöt i proiec „Cohousing“ y "Sparagn Ciasa/Bausparen") por la cumpra y la costruziun de na pröma ciasa. „Te chësc contest él dër important y de valüta che i jogn portes dant instësc propostes y idees che dëida dër tröp l'aministraziun provinziala da integré dantadöt sües esigënzes y ghiranzes“, á dit l’assessur ladin Florian Mussner tratan l’incuntada. Te chësc setur él dër important da lauré deboriada te na rëi danter istituziuns provinziales, di jogn y dl frabiché por ti respogn te na manira otimala ales sfidades futures, insciö l’assessur Mussner.
La direturia dl Ofize provinzial Svilup dla cooperaziun Manuela Paulmichl á spo presenté la tematica Cohousing y analisé dantadöt les prospetives por la jonëza tl Südtirol te chësc setur. Tres le proiet cohousing dessel insciö gní metü a desposiziun plü formes por abité adöm, cun abitaziuns da afité ia a jogn single y families jones che ti consintiss ales families da esters autonomes por ci che reverda l’abité y le laur. La Junta provinziala á aprové da püch la le ressanamënt dl frabicat da denant dla Telefonia statala tl zënter de Balsan sciöche pröm vare por realisé le pröm proiet de cohousing y coworking a livel provinzial.
Ralph Winkler, responsabl dl setur Gestiun tliënc de Pensplan Centrum AG, á sotligné le bun momënt por podëi aprofité dles alisiraziuns fiscales tres le proiet „Sparagn Ciasa/Bausparen“ che coliëia le sparagn por la ponsiun cun imprësc alisirá por podëi fá sö o cumpré ciases de proprieté.
L'architëta y rapresentanta di Comuns de Gherdëina Nadia Mororder á porté dant les poscibilités da anuzé por restrotoré les abitaziuns che vëgn conzedüdes a livel provinzial y les alisiraziuns por le sparagn energetich.
„Tratan la sëra él ince gnü partí fora n cuestionar ai presënc cun la maioranza che se dejidrëia na ciasa de proprieté tl post olache ai é nasciüs, che desmostra ince n gran liam cun la valada“, spliga Carla Pedevilla, responsabla dl sorvisc ai jogn tl’Intendënza ladina. „Ince sce le numer di damaná ne á nia valënza statistica á la maiú pert di jogn na perzeziun positiva por le dagní te chësc setur. Conscidran ince la gran spëisa por fá sö na ciasa é chësta na buna basa por lauré inant sön chësta chestiun“, dij Pedevilla.
Les proscimes döes sëres d’informaziun sará sëgn en vëndres ai 20 de ma dales 20.00 a La Ila y ai 27 de ma tres dales 20.00 a Al Plan. Plü informaziuns dessot.
La secunda sëra d’informaziun gnará tignida
en vëndres, ai 20 de ma dl 2016
dales 20.00
tla sënta dl Zënter di Jogn „SaJ.uN“
a La Ila
cun daimpröma n referat dl ombolt da San Martin Heinz Videsott sön la tematica „Abité y Comuns“ y spo cun le referat de de Manuela Paulmichl, direturia dl Ofize provinzial Svilup dla cooperaziun sön la tematica Cohousing: cares é pa les poscibilités tl Südtirol? Spo él sön le program na discusciun. I jogn á la poscibilité da s'la cunté y dandaldöt se confronté cun i ombolc y i assessurs.
La terza sëra d’informaziun gnará tignida
en vëndres ai 27 de ma dl 2016
dales 20.00
tla sënta dl Salf dla Cassa Raiffeisen
a Al Plan
cun daimpröma n referat de Thomas Walder dla Direziun de Pensplan Centrum sön la tematica dl „Sparagn Ciasa“ y spo cun n referat di esperc dla Cassa Raiffeisen Thomas Pescollderung y Manfred Vanzi sön la tematica „Finanziamënt Ciasa“. Düc i partezipanc ará spo la poscibilité da fá domandes tratan na discusciun cun düc i reladus.
Düc i jogn y dötes les jones é inviades a tó pert ales incuntades, l'entrada é debann. Les sëres vëgn metüdes a jí cun l'aiüt dla Pensplan Centrum AG, dl Ofize Provinzial Svilup dla cooperaziun y dla cassa Raiffeisen.
rc
Galaria dales fotografies
d.m.c. (sentá): Doris Mussner, Carla Pedevilla, Christian Pescoll y Gabriel Stuffer y d.m.c. (impé): Lena Mulser y Milena Kostner
