Dala Junta: domandes „tavolares“ digitales por avocac y ënc
Düc i avocac dla Talia y düc i ënc publics podará mené inant dai 10 de jügn inant les domandes d’inserimënt tl Liber fondiar ince tres spediziun telematica.
La Junta provinziala á aprové incö, ai 24 de ma, l’ativaziun dl sorvisc ajuntif de spediziun telematica de düc i documënc y ac che reverda les domandes d’inserimënt tl Liber fondiar por düc i avocac dla Talia y i ënc publics. Sön proposta dl assessur provinzial por le cataster y le liber fondiar Christian Tommasini á la Junta provinziala dé süa aprovaziun al’introduziun, dai 10 de jügn inant, al sorvisc ajuntif de spediziun telematica dles domandes „tavolares“ che reverda düc i Comuns catastai de competënza di ofizi dl Liber fondiar dl Provinzia. „De chësc sorvisc pó sëgn ince s’anuzé düc i avocac dla Talia y düc i ënc publics, do che le sorvisc é gnü sperimenté dal 2015 inant cun l’ampliamënt ince a düc i notars dl Südtirol y de düc i ofizi dl Liber fondiar“, spliga Tommasini.
La trasmisciun dla documentaziun te forma digitala sará insciö n’alternativa ala trasmisciun tres papier. Al se trata de n vare dër important dla informatisaziun di sorvisc che reverda le liber fondiar y le cataster: coliada cun la spediziun telematica dles domandes é la prozedöra digitala ponsada dantadöt sciöche sauridanza. „Implü é chësc n vare important ince tl vers de n smendrimënt dla burocrazia. L’aplicaziun anüza les tecnologies plü modernes, dëida da smendrí le percurs de informaziun y da mioré l’organisaziun dl laur ti ofizi provinziai“, sotlignëia Tommasini.
rc
