Dala Junta: mosöres de sostëgn ai pici raiuns da jí cui schi
La Junta á aprové mosöres nöies por sostigní i raiuns da jí cui schi mëndri cun n’atenziun particolara ai implanc portamunt di paisc. Domandes cina ai 30/09.
I criters aprová incö (ai 24 de ma) dala Junta provinziala reverda le sostëgn finanziar al svilup di pici raiuns da jí cui schi y di implanc portamunt di paisc. La bandida da denant é gnüda scrita fora tl 2012. Les alisiraziuns nöies reverda insciö les impreses che se dá jö cun n’ativité economica tl Südtirol y por chësta mosöra speziala mët la Junta a desposiziun 3 miliuns de euro sciöche contribuc al ann. „I pici raiuns dai schi ne á insciö nia ma na valüta soziala por la comunité locala, mo ai é ince importanc por l’economia dles zones da munt y dalunc dales cités“, á splighé le presidënt Arno Kompatscher. Implü é ince i pici raiuns dai schi tl dagní en pericul da scomparí, deache ai ne pó nia se mosoré cun la concorënza internazionala te chësc setur sce ai ne vëgn nia daidá tres n sostëgn spezifich, insciö Kompatscher.
I criters nüs gnará aplicá ales domandes de alisiraziuns che gnará presentades dal mëis de ma dl 2016 cina ai 31 de dezëmber dl 2020. Por proiec de investimënt por le svilup di raiuns dai schi pó le sostëgn finanziar curí l'80 porcënt dla soma dl investimënt. Al é ametüs proiec che reverda lec artifiziai, implanc por nëi artifiziala, iac dala nëi, rëis por la segurëza, implanc d’ilominaziun y plazes da parchené dlungia les staziuns a val. I criters nüs por podëi fá domanda é: na portada complessiva de nia plü de 5.500 porsones al’ora, implanc portamunt di paisc y staziuns dai schi che ne á nia plü co 2.000 posć de sojornanza por schiadus y che á n davagn dal schipass edemal plü bas dl 15 porcënt dl davagn total. Implü pó ince fá domanda düc i gesturs che á manco de trëi implanc portamunt o che á na posiziun te zones rurales cun püch turism y n’economia plü debla.
Les alisiraziuns pó gní conzedüdes sot forma de contribuc zënza retüdes. Les domandes de alisiraziun mëss gní presentades cina ai 30 de jügn de vigni ann, ma por l’ann atual (2016) é la tomada dl termo por fá domanda ai 30 de setëmber. Por i gran raiuns dai schi é le sostëgn indere garantí tres le finanziamënt alisiré dal Fonds de rotaziun.
rc
