Dala Junta: dal 2018 aumentëia la cuta de sojornanza ti Comuns
Por garantí le finanziamënt dles organisaziuns turistiches y la promoziun mirada tl setur s’alza dal 2018 inant la cuta comunala de sojornanza.
L’aumënt dla cuta comunala de sojornanza sará zirca dl 20 porcënt y l’aumënt sará efetif dal 2018 inant cun la reorganisaziun dles strotöres turistisches. La mudaziun dl regolamënt d’esecuziun é gnüda aproada dala Junta provinziala do avëi aldí i rapresentanc di Comuns, dles organisaziuns turistiches, di hoteliers, di afitaciamenes, di paurs y di gesturs de campings, á recordé le presidënt Kompatscher. L’obietif dla mosöra é da ti jí adincuntra al aumënt dl budget por le marketing dla destinaziuns y por mantigní le Südtirol competitif ince sön le marcé turistich.
La cuta é gnüda stabilida cun l’obietif da davagné un n euro por pernotamënt, mo conscidran i 29 miliuns de pernotamënc é le davagn sté de 23 miliuns, conscidran ince na seria de eseziuns dal paiamënt dla cuta. Dal 2018 inant passará insciö la cuta da 1,30 a 1,50 euro por la hoteleria cun 4 y 5 stëres, da 1 en euro a 1,20 euro por düc i eserzizi a trëi stëres y por düc i atri eserzizi sará la cuta de 85 centejimi.
Tla mudaziun dl regolamënt d’esecuziun él ince gnü inserí n passus che ti pormët ai Comuns da aumenté la cuta de sojornanza cina al mascimo 2,50 euro por sostigní proiec particolars, mo ma cun l’arat positif dl’assoziaziun tursitica locala. Le Comun pó assegné döta la soma o na pert dla soma dl aumënt dla cuta diretamënter al consorz turistich teritorial, sce chësc é ince preodü tres n arat da pert dl’assoziaziun turistica locala, sceno resta la soma al’assoziaziun locala dl turism. Nia paié ne mëss la cuta comunala de sojornanza düc i ghesć dles üties da munt, i mituns y les mitans sot ai 14 agn y les porsones che sojornëia por frecuenté manifestaziuns didatiches y de formaziuns de scores publiches.
La lege nöia de reforma dl finanziamënt dl setur turistich é varënta da 4 agn incá y vëgn finanziada da trëi pilastri: i contribuc dala Provinzia, i contribuc dai ghesć y i contribuc dales aziëndes de sojornanza. Le contribut dl ghest á inom „cuta comunala de sojornanza“ y ara é gnüda azetada dai ghesć zënza de gran problems y ti pormët ai Comuns da reperí ressurses ajuntives por le marketing de destinaziun turistica.
rc
