Criters por la conzesciun secundara di sorvisc dl trasport publich
Cun tl zënter la cualité á la Junta provinziala aprové inier i criters y i standarg por la conzesciun secundara di sorvisc dl trasport publich de porsones.
I consorc dl setur coordinëia l’assegnaziun te conzesciuns secundara di sorvisc dl trasport de linia ai propi assoziá, por n’adoranza efiziënta y economica dles ressurses. Sön proposta dl assessur por la mobilité Florian Mussner á la Junta provinziala stabilí inier i criters por la conzesciun secundara di sorvisc dl trasport publich de porsones y dles modalités por l’adoranza di mesi, canche i conzescionars ne á nia les ressurses nezesciares por podëi assiguré i sorvisc te na manira efiziënta.
„Tl sorvisc dl trasport publich orunse pité cualité y efiziënza ti sorvisc de linia. I orun svilupé na rëi che funzionëia bun y insciö él gnü stabilí na seria de regoles por la conzesciun secundara di sorvisc“, sotlignëia Mussner. L’obietif é chël da garantí al’anuzadú sorvisc cun tarifes a bun prisc y cun la cualité plü alta poscibla. Insciö él scrit dant che por efetué sorvisc de trasport de linia y integratifs de linia mëss les corieres nia avëi plü co 12 agn dala pröma imatricolaziun, ares mëss avëi les atrezadöres tecniches por timbré les chertes de iade y por segnalé la proscima architada y cun posć resservá a porsones cun handicaps.
Danter les oblianzes dl’impreja subafidatara él l’aplicaziun de contrac coletifs statai y integratifs dl setur por le personal, da respeté le bilinguism, da garantí la presënza de informaziuns söi orars dles corieres y de mudaziuns eventuales. I criters regolamentëia implü ince les autorisaziuns al’adoranza dles corieres de linia y por i sorvisc aldinfora dles linies. Implü él ince gnü metü so i criters por l’imprëst de corieres por sorvisc de linia y por mesi cina a 9 posć.
rc
