Dala Junta: aproada la cumpra dl archif de Ciastel Coira
La Junta provinziala á deliberé incö la cumpra dl archif storich de Ciastel Coira, na testimonianza de gran valur dl Tirol storich.
Un di compic plü importanc dl Archif provinzial y dla Repartiziun Bëgns culturai é chël de mantigní i bëgns culturai por le dagní, dai analisé te na manira scientifica y da i mët a desposiziun dla popolaziun y dla sciënza. Na sbürla importanta te chësta direziun é gnüda incö dala Junta provinziala, che á stabilí da cumpré l’archif dl grof Trapp tl Ciastel Coira, sot a sconanza dal ann 1964 y de proprieté de Gaudenz Hieronyms Graf Trapp. Al sará l’Archif provinzial che se fistidará insciö dla cura dl archif dl Ciastel. Le prisc é gnü inrescí tres na sciazada y é de 1,9 miliuns de euro.
„I documënc dl archif dl Ciastel Coria vá zoruch cina al 12ejimo secul. L’archif é un di plü gragn y di plü importanc dla nobilté dl Südtirol, cun n’importanza che vá sura i confins tirolej fora“, spliga l’assessur competënt por i bëgns culturai Florian Mussner. Cun la gestiun da pert dl Archif provinzial sarál poscibl da garantí tl dagní n’aministraziun adatada y n anuzamënt tresfora por döt l’ann, ince por ti respogn ales tröpes domandes che é tres de plü por inrescí tles fontanes dl archif, insciö Mussner.
Tl archif de Ciastel Coira él danter l’ater da ciafé pergamenes dal 12ejimo secul inant cun contignüs che reverda les families nobles Matsch, Trapp, Hendl, Castelbarco, Wolkenstein y ince documentaziuns che reverda l’aministraziun dles signories storiches de Gluorn, Caldonazzo y Beseno y la corespondënza storica danter i vëscui de Cuira (Grijiuns), Porsenú y Trënt. „L’Archif é na fontana importanta por inrescí la storia de nosta provinzia y al arichësc cun sü documënc storics l’arpejiun culturala dla Provinzia“, insciö Mussner.
rc
