Dala Junta: prozedöra de nomina di suranstanc dl’Aziënda sanitara
Aproada incö dala Junta provinziala la prozedöra de seleziun di direturs sanitar, aministratif y tecnich-assistenzial dl’Aziënda sanitara provinziala.
Le diretur sanitar, le diretur tecnich-assistenzial y le diretur aministratif dl’Aziënda sanitara provinziala é, adöm cun le diretur general, i majeri responsabls dl manajamënt dl sistem sanitar publich tl Südtirol. „Öna dles funziuns plü importantes di direturs sará l’atuaziun dla reforma tl setur dla sanité“, á splighé l’assessuria provinziala por la sanité Martha Stocker do la sentada dla Junta. Chësc compit reverda le plann sanitar provinzial che piará ia de jügn adöm cun la reorganisaziun di sorvisc dl’Aziënda sanitara provinziala.
Incö á la Junta provinziala scomencé la prozedöra por curí i posć di trëi direturs atuai Oswald Mayr (diretur sanitar), Robert Peer (diretur tecnich assistenzial) y Marco Cappello (diretur aministratif) cun l’aproaziun dl percurs de seleziun y le profil di candicac. I direturs Mayr y Peer, do avëi lauré ite i direturs nüs che gnará do, jará en posniun cun la fin dl ann. Le diretur aministratif Cappello á tut la dezijiun da mudé profesciun.
„Al é important che i candidac portes para de bunes esperiënzes y tröp impëgn, adöm cun les competënzes spezifiches. Te chësta manira sará poscibl da cherié n’aziënda sanitara moderna cun prospetives de svilup por düc y da garantí insciö n’assistënza sanitara de cualité alta“, sotlignëia Stocker. La prozedöra de seleziun, manajada dal Ofize Organisaziun dla Provinzia, gnará publicada ti proscims dis. I candidac ará spo 45 dis de tëmp por presenté sües domandes.
rc
