Dala Junta: lege söi apalc, aproá dui criters nüs
La Junta provinziala á aproé dui criters che reverda l’aplicaziun dla lege söi apalc y che prevëiga danter l’ater sovenziuns por aziëndes che laora cun lerneri.
La lege provinziala söi apalc é jüda ofizialmënter en forza ala fin dl ann passé, ma por ci che reverda la pert dl’aplicaziun dles desposiziuns él gnü adoré i regolamënc d’atuaziun. N passaje important é insciö gnü a se le dé incö (ai 31 de ma) cun l’aproaziun da pert dla Junta provinziala dla delibera che á stabilí i standarg por l’estlujiun automatica de ofertes anormales massa bases y i criters de cualité por la surandada dles gares che reverda l’ocupaziun de lerneri.
Le pröm punt fej referimënt ales prozedöres de assegnaziun di sorvisc por architëc y injiniers por somes sot ai 209mile euro, cina chi che al é poscibl da apliché le criter dl’oferta plü basa ince ma sön la basa dl prisc. „Te chësc caje sarál poscibl da ne tó nia en conscidraziun ofertes anormales massa bases che portass a n stritoz sön i prisc y a prestaziuns de cualité sot ai standarg preodüs“, á splighé le presidënt dla Provinzia Arno Kompatscher. La formula da apliché sará insciö n criter che prevëiga che la diminuziun dl prisc ne pois nia superé le valur mesan de dötes les diminuziuns presentades dai atri partezipanc ala bandida, cun de piceres mudaziuns da ajunté sön la basa dl numer di concorënc.
La secunda variaziun inserida tla delibera aproada dala Junta reverda na premia ales aziëndes che ti dá da laur ai lauranc cun contrat de lernerat aladô de na valutaziun ad hoc. „Chësc criter é öna dles mosöres por sostigní les prozedöres de apalt che tëgn ince cunt di aspec soziai y dl marcé dl laur, sciöche ince preodü dala normativa europeica“, á comenté le presidënt Kompatscher. Trames döes les desposiziuns jará en fora tl momënt dla publicaziun söl Boletin ofizial dla Regiun Trentin Südtirol.
rc
