Politica | 06.06.2016 | 18:08

Kompatscher incunta Boschi: "La colaboraziun á porté de bugn resultac"

Vijita a Balsan incö dla Ministra Maria Elena Boschi, incuntada cun Kompatscher y i parlamentars: la colaboraziun cun le govern funzionëia.

La Ministra por les reformes costituzionales y i raporc cun le Parliamënt, Maria Elena Boschi, s’á incunté incö domisde, ai 6 de jügn, naota cun le presidënt dla Provinzia Arno Kompatscher. Do na vijita tl ofize dl Landeshauptmann á la Ministra spo incé incunté na pert dla Junta provinziala, i suranstanc dl Consëi provinzial y i parlamentars südtirolej. Daldô él spo gnü a se le dé n’indunada cun i mass media por ti dé lerch ales detlaraziuns ofiziales tla curt interna dl Palaz Widmann. Presentan i obietifs arjunc ti ultims dui agn y ciaran ai traverc di proscims agn á le presidënt dla Provinzia Arno Kompatscher splighé che „la colaboraziun cun le govern da Roma y la Junta provinziala funzionëia. La gran pert di punc presentá al intern dl’acordanza politica é gnüs arjunc.“

Öna dles arjuntes plü importantes é dessigü la tlausola de proteziun por ci che reverda la reforma dla Costituziun che prevëiga che al é poscibl da mudé le Statut d’Autonomia ma en acordanza cun la Provinzia. N’atra arjunta é la prozedöra scemplificada por le trasferimënt dles competënzes. „Te chësta manira sun stá bugn da arjunje garanzies importantes por l’autonomia ince por mirit dl’ancoraje internazional, che nes confermëia ciamó n’iade che l’autonomia südtiroleja é speziala danter les speziales“, á dit Kompatscher. Por ci che reverda le dagní á le presidënt dla Provinzia sotligné che la orenté é chëra da jí inant „sön le percurs scomencé cun n orientamënt tler tl vers dl’Europa che fejes aldinfora dl Südtirol n punt de coliamënt danter la Talia y le monn todësch.“

Sön chësta tematica á ince sotligné la Ministra Boschi che „le rode de mediaziun y de coliamënt dla Provinzia de Balsan é important dantadöt ince por ci che reverda la tematica zitia dl Prener.“ La Ministra á ince fat referimënt ala reforma dla Costituziun, ajuntan che „degügn ne á mai ponsé da smendrí l’importanza dles autonomies spzieales, che vëgn valorisades. La confidënza y la colaboraziun é stades cina sëgn dër positives y ince por chël él l’acordanza danter le govern local y chël nazional n pat che funzionëia. Le Südtirol é insciö por tröc aspec n model da imité“. La Ministra á spo ince anunzié che „döes normes d’atuaziun sön le comerz y la ciacia é tan co aproades“.

Le parlamentar ladin Daniel Alfreider á spo sotligné l’importanza dla proposta de lege de sconanza dla mendranza ladina che é dötaurela en discusciun a Roma y che contëgn de plü mosöres de proteziun y de promoziun dl grup linguistich ladin. Implü á Alfreider ince sotligné le gran vare arjunt che reverda le renovamënt dla conzesciun dl A22 a na sozieté in house, „n’acordanza importanta deache ara nes consënt da manajé les chestiuns che reverda l’autostrada diretamënter söl post y da investí tl teritore südtirolej, cun n’atenziun particolara al tunel dl Prener y ales trates d’azes“.

Le senatur Karl Zeller á recordé che „mai sciöche ti ultims dui agn él sté meso da lauré tan bun adöm cun le govern nazional y chësc é le resultat de na buna acordanza programatica, de n govern sensibl ales chestiuns dl’autonomia y de na scuadra de parlamentars che tëgn adöm.“ Le secreter de Stat Gianclaudio Bressa á recordé tratan l’incuntada cun i media che „l’ordinamënt finanziar nü danter le Stat y la Provinzia á süa fondamënta sön i valurs dl’autonomia, dla responsabilité y dla solidarieté y é insciö n model da imité.“

Dessot la poscibilité da desciarié les imajes dles incuntades y dla conferënza stampa de na ressoluziun alta, ala fin ince cun l’incuntada cun i ombolc dles valades ladines:

Imajes y video incuntada Kompatscher y Boschi

USP