70 agn dal’Acordanza de Paris, ediziun speziala dla Provinzia
N’ediziun speziala dla revista dla Provinzia dl Südtirol gnará a se le dé en gaujiun di 70 agn dal’Acordanza de Paris. Düc pó damané do na copia debann.
Al pröm de agost él preodü la publicaziun de n’ediziun speziala dla revista dla Provinzia Autonoma de Balsan y che podess ester n numer de interes particolar dantadöt por i apascioná de storia. Tl zënter dl’ediziun sarál insciö l’aniversar di 70 agn dala sotescriziun storica dl’Acordanza de Paris da pert di Ministri por i afars esters dla Talia y dl’Austria, Alcide Degasperi y Karl Gruber. Al se trata dla „Magna Charta“ dl’autonomia südtiroleja, y cun la publicaziun nöia vëgnel ince analisé le svilup dl teritore südtirolej che gonot vëgn ince odü sciöche n model por ci che reverda la soluziun pazifica de conflic.
Nia ma le tëmp passé, mo ince le dagní sará tl zënter dles analises di esperc de storia y di direturs di foliec locai che analisëia l’evoluziun dl Südtirol dai agn 40 cina aldedaincö y ti proscims 20 agn. Implü ciafará ince na gran lerch i retrac y les fotografies storiches y atuales. Sciöche vigni ann gnarál ince chësc ann festejé ai 5 de setëmber, de dla firma dl’acordanza tl ann 1946, le De dl’autonomia.
La revista, che gnará publicada sides por talian co por todësch cun ince temesc che reverda le grup linguistich ladin, pó gní damanada do debann cina ai 20 de jügn invian na email a margit.adami@provincia.bz.it o scrion fora le formular tla seziun „publicaziuns“ dla homepage dl Ofize stampa www.provinzia.bz.it/news.
rc
