Ativités da d’isté, 260 oportunités por 50.000 mituns y jogn
Cun la fin dla scora mëtel man na seria de iniziatives por 50.000 mituns y jogn südtirolej. Incö á l’assessuria Deeg presenté le program por l’isté 2016.
Fá para pó düc i mituns, les mitans, jogn y jones dai 3 ai 15 agn. Indöt vëgnel metü a desposiziun dala man publica 6 miliuns de euro por l'organisaziun de 260 proiec tratan i mëisc da d'isté dl’ann 2016. L’assessuria provinziala Waltraud Deeg á presenté incö (ai 10 de jügn) le program detaie prezisan che „nosc obietif é chël da amplié l’oferta bele ampla y da orëi curí döta la perioda da d’isté zënza scora. Chësc é ma poscibl por mirit dla buna colaboraziun cun i Comuns y les istituziuns söl teritore.“ Dantadöt tla perioda da d’isté él öna de dles priorités plü granes dla Junta chëra da ti pité ai geniturs n’oferta che pois ti dé na man ales families da colié le laur cun le tëmp a ciasa, insciö Deeg.
Le program dles ativités estives dedicades ai mituns y jogn gnará desfiré por l’ 80 porcënt da istituziuns privates (cooperatives soziales, assoziaziuns sportives, zëntri por la jonëza, scores de lingac, laboratori y organisaziuns no profit) che vëgn sostignides tres contribuc dal’aministraziun provinziala. „Por mioré ciamó de plü l’oferta ún porvé da coordiné de plü les ofertes y da planifiché les ativités te na manira por che ares ti vais adincuntra ales families“, spliga Gerhard Mair dl’Agenzia por la familia. Cun i criters nüs sará la dorada minima di proiec de öna n’edema, le numer plü bas di partezipanc passa da 10 a 8. Da inann s’alza ince l’eté plü alta di partezipanc da 14 a 15 agn, por i jogn cun handicap da 14 a 18 agn. Informaziuns plü detaiades pón ciafé ti Comuns o pro l’Agenzia familia dla Provinzia (www.provinz.bz.it/familie).
rc
