Referendum sön l’aeroport da Balsan, al davagna le no cun sura 70%
Plü co 70 porcënt di litadus á dé jö süa usc por le no al referendum de consultaziun söl aeroport da Balsan. Dales 11.00 conferënza stampa.
Ares é gnüdes stlütes jö incö danmisde les operaziuns de cumpëda dles usc dl referendum consultif provinzial sön le dessëgn de lege „Normes söl aeroport da Balsan“, che á registré la partezipaziun dl 46,7 porcënt di zitadins cun le dërt de lita. Chësta porzentuala de partezipaziun á ince consintí da superé le cuorum dl 40 porcënt che ti dá validité legislativa ala consultaziun.
Bele püch menüc do les 7, do la daurida dles sëntes litales, él rové adalerch tla Zentrala litala i pröms resultac, che á bele da atira lascé adintëne n numer plü alt de litadus por le no al proiet de svilup dla plaza di fligri da Balsan. I dac definitifs é rová adalerch dales 10.10 cun chësc resultat final: 70,6 % por le NO, 29,4 % por le SCE. Ti Comuns ladins (Badia, Corvara, La Val, Mareo, San Martin, Santa Crestina, Sëlva, Urtijëi) á le no arjunt na porzentuala de 57,1 porcënt y le sce de 42,9 porcënt.
Le resultat dla consultaziun gnará comenté dal presidënt Arno Kompatscher, dai assessurs Florian Mussner (mobilité) y Richard Theiner (ambiënt) te na conferënza stampa söl program dales 11 tl salf stampa dla Junta provinziala. Düc i dac é incé da ciafé oinline sön lites.provinzia.bz.it, la Zentrala litala é ince da ciafé sön facebook y twitter cun l’account @ReferendumAA (hashtag #refaa16)
rc
Galaria dales fotografies
Foto USP/mb
