Dala Junta: bandida por l’archirida, gradatöra finala
Do la contlujiun dla prozedöra de valutaziun á la Junta provinziala aproé incö le finanziamënt de 12 proiec d’archirida che á davagné la terza bandida.
„La Provinzia promöii le svilup y l’internazionalisaziun dl’archirida scientifica ince tres bandides cun finanziamënc de proiec che reverda l’archirida scientifica“, á recordé incö le presidënt dla Provinzia Arno Kompatscher do la sentada dla Junta. Do la prozedöra de valutaziun da pert di esperc él gnü stabilí i mius 12 proiec danter les 161 propostes dades jö. Sön la basa dla gradatöra finala á la Junta provinziala deliberé incö da assegné ai 12 proiec indöt n finanziamënt de 2,5 miliuns de euro por i proscims trëi agn 2016 – 2018. I proiec presentá reverda proiec de injinieria zivila, archeologia, neurobiologia, storia, sciënzes agricoles y forestales, zoologia, sciënzes dla formaziun, idrologia, injinieria mecanica, chimica, sciënzes naturales, linguistica y biologia. Al é proiec de archirida de basa y de archirida aplicada che á le fin da ti dé respostes ales esigënzes speziales dl Südtirol por ci che reverda la sostenibilité ambientala, la gestiun dl teritore da munt, la conescënza storica y la mediaziun linguistica.
I proiec dla terza bandida é gnüs presentá dai ënc de archirida prinzipai dl’Euregio y che conscidrëia insciö n numer alt de studënc südtirolej y che é de relevanza por le raiun alpin sides por ci che reverda la sciënza co la formaziun locala. Al se trata danter l’ater dl’Univeristé de Balsan, Eurac, Museum Natöra, Museum archeologich y dles Universités de Trënt y Desproch. I proiec che á davagné prevëiga implü na colaboraziun danter i ënc de archirida locai cun les istituziuns de archirida nazionales y internazionales.
I 12 proiec podará avëi na dorada dai 2 ai 3 agn, „les ressurses finanziares metüdes a desposiziun é insciö n investimënt de gran valüta por aumenté la competitivité dl Südtirol“, á dit Kompatscher. Conscidran le gran numer de domandes cun na valutaziun alta fajará la Junta provinziala na valutaziun por ciaré sce al é poscibl da alzé les ressurses finanziares dla bandida por sostigní de plü proiec. Danter i 12 proiec selezioná él ince da ciafé danter l’ater le proiet “IN-IN Instruments for Inclusion“ presenté dal Université Lëdia de Balsan adöm ales trëi Intendënzes scolastiches y ince le proiet dl Université de Trënt por aumenté la sostenbilité energetica tles regiuns alpines.
rc
