Dala Junta: criters por i acompagnadus de escursciuns sö por munt
La Junta provinziala á aproé incö i criters por les ativités de acompagnamënt sö por munt cun cursc de preparaziun y l’iscriziun te n register spezial.
Tres na definiziun tecnica é n „acompagnadú sö por munt“ chël che acompagnëia profescionalmënter i escurscionisć sön les sëmenes sö por munt, mo nia sö por ferates, sëmenes da fá cun atrezadöres y söi dlaciá. I trus reverda insciö raiuns che ne é nia sot al prigo de lovines o che se damana n’atrezadöra alpinistica aposta. Chësta figöra de acompagnadú espert mëss ester scrit ite te n register spezial y l’iscriziun pó gní fata do n curs de preparaziun cun n ejame final.
N iade che l’ejame é gnü superé ciafa i acompagnadus nüs na cherta de reconoscimënt y n documënt de legitimaziun da pert dl Collegium di mëncrëp. Incö, mertesc ai 14 de jügn, á la Junta provinziala definí i criters por eserzité l’ativité de acompagnadú tles escursciuns sö por munt. „I acompagnadus é ambasciadus de nosta provinzia deache ai ti fej conescë ai ghesć la cultura, la natöra y les particolarités de nosta tera. Le diretives nöies pormët da cherié n standard de cualité alt“, á dit le presidënt Kompatscher do la sentada dla Junta.
Le curs de preparaziun á na dorada mascima de 120 ores cun na prova tecnica y pratica: danter i temesc che fajará pert dl ejamé final él la organisaziun de escursciuns, la conescënza dl teritore, meterologia y la conescënza dles condiziuns dla nëi, dla flora y la fauna dl Südtirol y ince la gestiun di caji de pröm aiüt. I acompagnadus á implü l’oblianza da frecuenté vigni trëi agn n curs d’ajornamënt dla dorada de dui dis. Chi che á bele fat n curs de 100 ores y á superé l’ejame final dan l’atuaziun di criters nüs pó damané l’iscriziun ala lista speziala.
rc
