Dala Junta: prestaziuns de basa di ospedai, aprová i profii nüs
La Junta provinziala á definí incö i profii dles prestaziuns de basa di set ospedai por garantí n’assistënza sanitara valia sön döt le teritore.
Les prestaziuns de basa che i set ospedai dl Südtirol messará garantí reverda i seturs dla Medejina interna, Chirurgia, Ortopedia-Traumatologia, les prestaziuns de ambulatore y l’assistënza de pröm socurs. Al se trata de chëres prestaziuns sanitares generales che vëgn anuzades dal 70-80 porcënt di paziënc diretamënter tles strotöres söl post.
„L’obietif dla definiziun dles prestaziuns aprovada incö é chël da garantí sön döt le teritore n’assistënza de basa unitara y valia, te na manira che i paziënc pois s’anuzé dla medema assistënza sanitara te düc set i ospedai südtirolej“, á splighé do la sentada dla Junta l’assessuria por la sanité Martha Stocker.
Por podëi garantí les medemes prestaziuns de basa messará i ospedai tl medemo raiun lauré adöm aladô dl prinzip „un n ospedal, döes sëntes“ (por plü infomraziuns ciara comunicat stampa da incö söl Plann sanitar). Dlungia les prestaziuns sanitares de basa gnarál pité ti ospedai ince prestaziuns speziales che sará desfarëntes da ospedal a ospedal y insciö nia les medemes sön döt le raiun provinzial.
rc
