#prömtëmp: Deeg: families, aministraziun publica, svilup digital
Sostëgn ales families, l’inovaziun dl’AP y le svilup digital é stades les tematiches prinzipales dl’incuntada de #prömtëmp incö cun l’assessuria Deeg.
#prömtëmp, la seria d’incuntades do mesa la legislatöra vëiga danfora che les assessuries y i assessurs presentëia ai media le bilanz y ince les prospetives por le dagní te "sü " seturs. Incö él sté la ota dl’assessuria por les families, l’aministraziun provinziala y le svilup digital Waltraud Deeg.
219 miliuns de euro por les families
„Tla program dla Junta é la familia na tematica zentrala“, á sotligné l’assessuria provinziala competënta Waltraud Deeg incö tla Ciasa dla familia söl Ritten tratan la conferënza stampa do le #prömtëmp dla Junta. La politica por les families á süa fondamënta sön trëi pilastri: le renforzamënt abonora, la conziliaziun danter familia y laur y le sostëgn finanziar. „Insciö él sté meso da aumenté les ressurses finanziares tl bilanz provinzial: le budget por la familia é chersciü da 54,4 miliuns de euro tl 2014 a 60,1 miliuns de euro tl 2015 y a 77 miliuns tl 2016“, á recordé Deeg. Na mosöra zentrala é ince l’aumënt da 100 a 200 euro dl assëgn por les families.
N ater sostëgn important por les families é l’assistënza extrascolastica y da d’isté y l’assistënza por i mituns cina ai 3 agn. „Aldedaincö é chëstes ofertes da ne ponsé nia plü demez por les families“, á dit Deeg. N ater vare important é stada l’aprovaziun da pert dla Junta dl ampliamënt dla cuantité y dla cualité dl’assistënza dla infanzia por n’oferta ampla che ti respogn ales esigënzes dles families“, á recordé l’assessuria. Tl dagní sará un di obietifs chël da svilupé inant la conciliaziun familia – laur sciöche tematica che reverda döta la sozieté y trami dui i geniturs, y nia ma les mames. „Te chësc vers orunse ince sostigní chëres families olache trami dui i geniturs se tol le tëmp de maternité y paternité“, á antizipé Deeg. Les ativités de formaziun, consulënza y acompagnamënt dles families é ince gnüdes sostignides da Assessorat te na manira mirada cun 3,6 miliuns de euro tl 2015 a bëgn de 80 organisaziuns che á metü da jí scomenciadies spezifiches, sciöche por ejëmpl i Zëntri geniturs y mituns (ElKi).
Inovaziun dl’Aministraziun publica
Un di plü gragn proiec de reforma dl setur dl’assessuria Deeg é la reforma dl’Aministraziun provinziala. „Le prozes de reforma, che á le fin da smendrí la burocrazia y da garantí ai zitadins n’aministraziun asvelta y eifziënta, é gnü a se le dé en colaboraziun cun i suranstanc, direturs, le personal y i sindacac“, á splighé Deeg. Por porté a fin chësc proiet é vigni unité aministrativa che á lauré fora n program n plann de performance anual che é la basa por la planificaziun plurianuala cun la lista de dötes les prestaziuns de vigni unité, dles ressurses nezesciares y dles priorité de svilup. Tl mëis de merz dl 2015 él gnü insedié la Comisciun por la revijiun dla spëisa publica, n grup de 5 esperc che laora al’analisa dl bilanz provinzial por individué les poscibilités de sparagn. N obietif por le dagní sará na portina por les relaziuns cun i zitadins, sciöche pröma istanza de contat y dialogh cun i zitadins. N punt che reverda le personal é ince la lege nöia che é gnüda aprovada y che garantësc na basa iuridica spëssa. Implü ti él gnü garantí ai zirca 40mile dependënc publics (nia ma provinzia) n aumënt dl paiamënt de 40 euro lordi dal 1 de messé dl 2016 y atri 40 euro dal 1 de ma dl 2017.
I vari inant pro le svilup digital
Le proiet Südtirol digital 2020 á metü man tl ann 2014 cun l’elaboraziun de n plann d’obietifs da arjunje por ci che reverda le svilup digital dl’aministraziun provinziala en acordanza cun les diretives dl’Uniun Europeica y dla Talia. Te otober dl 2015 él spo gnü aprové le plann strategich che prevëiga cinch ciamps d’aziun da „curí“ cun na seria de mosöres y obietifs: l’infrastrotöra digitala, l’aministraziun digitala, l’economia digitala, la formaziun digitala y l’IT Governance. „Chësc prozes portará spo ala definiziun dl plann strategich Südtirol digital 2020 cun le fin da armonisé i sorvisc IT de dötes les strotöres aministratives, dala Provinzia ai ënc locai, dala scora ala sanité“, insciö Deeg. Söl agenda dl’assessuria él ince por le dagní le svilup por n’adoranza plü ampla di Open data. Implü él ince gnü fat tratan la conferënza stampa n ressüme dla situaziun por ci che reverda la vëta leria söl teritore. „Indöt 1100 chilometri di coliamëns sön les linies prinzipales é bele atifs“. Tla rëi prinzipala dla Provinzia él gnü colié 124 dles 156 zentrales Telecom, y ince nü sic de trasmisciun RAS (cun cinch che röia lapró). „Indöt 188 stotöres publiches te 37 Comuns é bele coliá al internet asvelt y atres 44 röia ciamó lapró por la fin dl’isté“, á stlüt jö Deeg.
Imajes
Imajes conferënza stampa Deeg - https://we.tl/ANYo1sDMON
rc
