L’Europeada ti fej na vijita al Museum Ladin
I sogadus y les sogadësses dl’Europeada 2016 s'á incunté incö por festejé adöm le De cultural tl Museum Ladin a San Martin
Indöt 29 scuadres (23 scuadres de ëi y sis de ëres) tol pert al’Europeada 2016, le campionat dl jüch al pale dles mendranzes europeiches che vëgn organisé tla Val de Puster y tla Val Badia. Dötes les scuadres s’incunté incö, ai 22 de jügn, cun sües delegaziuns al De cultural tl Museum Ladin Ciastel de Tor a San Martin de Badia. L’incuntada fej pert dl program dl campionat che vëgn sostigní dala Federal Union of European Nationalities (FUEN) y che vëgn organisé adöm cun l’Uniun dles assoziaziuns sportives dl Südtirol (SVV). La manifestaziun é gnüda daurida cun n’esibiziun musicala dla ciantarina y artista Susy Rottonara. L’assessur por la cultura y scora ladina Florian Mussner á sotligné por l’ocajiun l’importanza „da s’incunté danter rapresentanc de mendranzes linguistiches, che mëss se confronté te sü raiuns cun les medemes sfidades, mo che á ince la medema richëza da podëi rajoné y intergní te plü lingac“. Dantadöt la gran pasciun di jogn y dles jones nia ma por le sport, mo ince por la cultura, i lingac y les tradiziuns é n sëgn dl gran respet por les mendranzes y süa diversité t’Europa, insciö Mussner. L’assessuria por le sport Martha Stocker á sotligné che „le sport ne conësc degügn confins y coliëia insciö cultures desfarëntes: le campionat dl pale dles mendranzes europeiches nes mostra insciö sciöche al é poscibl da rové adöm danter mendranzes desvalies“, dij l’assessuria por le sport. Parores de salüd é ince gnüdes portades dant da Loránt Vincze, presidënt dla FUEN cun daldô na performance realisada dal’artista ladina Anastasia Kostner.
L’obietif dl de, organisé dal Museum Ladin adöm al Istitut Ladin „Micurá de Rü“ y ala Repartiziun Cultura y Intendënza scolastica ladina, é sté chël da ti pité na suraodüda sön la pluralité di lingac, dles cultures y dles identités dl’Europeada. Dai sorbs dla Lusazia, ai tartars dla Crimea, dai oczitans ai slovens dla Carinzia cina ai todësch dla Ruscia, zënza desmentié naturalmënter i ladins y i südtirolej y düc i atri. Indöt á tut pert al de 800 porsones partides sö sön 23 mendranzes che á albü insciö l’ocajiun da s’incunté y da se baraté fora danter les cultures desvalies.
Le De cultural é jü inant domisdé cun n program davert por düc cun l’entrada debann por düc al Museumy le conzert dl grup musical ladin Jemm Music Project. La manifestaziun s’á stlüt jö cun na partida al pale dales 18 a San Martin danter na scuadra jonila dla Fuen y na delegaziun de profugs dl Südtirol.
rc
Galaria dales fotografies
