#prömtëmp, Mussner/1: mosöres por promöie la scora y cultura ladina
Pomöie la cultura ladina, cherié na rëi danter bëgns culturai y museums y mët en movimënt les porsones: chisc é stá i temesc dl #prömtëmp dl assessur Mussner
Tl mëteman á l’assessur ladin Florian Mussner recordé l’importanza dl’autonomia südtiroleja por le Südtirol en general y por la scora y cultura ladina tl spezifich. „Le grup linguistich ladin á dötes les istituziuns a desposiziun por sconé y svilupé inant süa arpejiun culturala y linguistica, implü á le sistem dl’autonomia ince porté ala realisaziun de na pedagogia y didatica spezifica tres chëra che al é poscibl da formé nüsc insegnanc y da svilupé inant le sistem paritetich“, á dit l’assessur Mussner. La scora ladina é ince na scora che se pó definí sciöche scora europeica, i chësc an ince odü se confrontan cun i rapresentanc dles atres mendranzes europeiches tratan l’Europeada, insciö Mussner.
De plü presënza dl Ladin te internet, la partezipaziun dles families pro l’insegnamënt dl ladin, la colaboraziun danter la cultura y l’economia locala y la promoziun suraregionala dl ladin ince cun Souramunt – chëstes é danterlater les tematiches futures dl assessur por la scora y cultura ladina Florian Mussner por i proscims 2,5 agn de legislatöra.
„Por podëi svilupé inant y mantigní na rujeneda y na cultura de mendranza mëss le rajoné ladin ester na tematica zentrala dla vita da vigni de dantadöt por les generaziuns che vëgn docá, mituns y jogn en pröma linia“, dij l’assessur por la scora ladina Florian Mussner. La cultura y la rujeneda mëss gní „viüdes“ y öna dles componëntes prinzipales é te chësc vers les families, che dess gní sostignides tresfora tl acompagnamënt dl insegnamënt dl Ladin dal sistem scolastich ladin. Insciö jará inant ince la promoziun dl’elaboraziun de publicaziuns didatiches, de libri de storia y de cultura, de dizionars y de atri materai d’ütl por scolars, maestri, geniturs y d’atri interessá. „N focus spezial ti gnará ince dé ai mesi de comunicaziun nüs, che é dantadöt por i jogn n stromënt dër anuzé y che dess tres de plü gní integrá ince tl orientamënt didatich, sciöche por ejëmpl i dizionars online, les plates internet por ladin, i social media…“, dij Mussner. Ince dess les ofertes bele presëntes dötaurela por ci che reverda le ladin, por ejëmpl ti seturs dla scora, dl’aministraziun publica y dles istituziuns culturales, gní plü conesciüdes por che i zitadins che rajona ladin s’informëies ince tres deplü ince tla rujeneda ladina, insciö Mussner.
N ater punt important dla legislatöra sará la promoziun dla colaboraziun cun i trëi Comuns de Souramunt, ince sciöche sëgn de n’Euregio viüda. „Chiló vëgnel bele lauré adöm sön l’intergaziun de n’ora de ladin tles scores y al é vëgn ince ejaminé poscibilités inserí l’insegnamënt dl todësch“, insciö Mussner. N ater obietif zentral restará por l’assessur ince por le dagní l’elaboraziun de mosöres adatades por evité le spopolamënt dla jonëza dales valades ladines; mosöres da elaboré en colaboraziun cun i Comuns.
Video dla conferënza stampa:
Intervista assessur Mussner por ladin:
rc
Galaria dales fotografies
