#prömtëmp, Mussner/2: bëgns culturai te na rëi, lege söi museums nöia
Amplié la colaboraziun dles istituziuns culturales é un di obietifs prinzipai por le dagní: chësc un di punc dla conferënza de #prömtëmp dl assessur Mussner.
"Ci che á valüta por la mendranza ladina tl spezifich, vél naturalmënter ince por la cultura de döt le Südtirol: apascioné i jogn da pici insö por la cultura, sconé le patrimone cultural, integré la cultura tla cuotidianité y conservé les strotöres che é les testimonianzes di bëgns culturai, les mët en mostra y te na rëi", á splighé l'assessur por i museums y i bëgns culturai Florian Mussner incö tratan la conferënza stampa do mesa legislatöra söl Ritten.
Te chësc contest organisëia la Repartiziun Bëgns culturai le proscim inver n congres internazional sön la relaziun danter sozieté-arpejiun-cultura, tratan chël che al gnará tematisé l’integraziun dla cultura tla vita cuotidiana sciöche ince le confrunt regional dla sconanza di bëgns culturai. Le browser dla Repartiziun dá l’azes a plü de 4.000 operes che é gnü metüdes sot a sconanza y vëgn ajorné tresfora. „Implü vëgnel lauré sön l’azessibilité dles scovertes archeologiches por la popolaziun en colaboraziun cun i Comuns. Tl setur dla sconanza di bëgns culturai sará tl dagní le focus sön na mioraziun dl sistem di contribuc publics: al se trata de valuté l’interes publich en relaziun al interes privat, cultural y economich y da chirí fora avisa les operes da mët sot a sconanza, cun spo ince n sostëgn finanziar daldô“, á dit l’assessur provinzial Florian Mussner.
Propi canche ara se trata de sconé, mantigní y documenté i bëgns culturai él nezesciar da avëi na colaboraziun strënta danter dötes les organisaziuns y istituziuns interessades. "N ejëmpl te chësc vers é le portal di bëgns culturai dl Südtirol, che gnará amplié tresfora cun le coordinamënt dla Repartiziun Museums", insciö Mussner. L’obietif é chël da registré te na manira unitara düc i bëgns culturai presënc tl Südtirol, dai cataloghé y dai mët a desposiziun de düc i zitadins tres n’esposiziun virtuala.
Al vëgn ince lauré fora dötaurela la lege provinziala nöia che reverda le setur di museums (chëra atuala é dl 1988) y l’assessur Mussner planifichëia da la porté en discusciun te Junta ciamó inann. Le test prevëiga n adatamënt ai critérs de cualité atuai aladô dla reforma dl Consëi internazional di Museums. L’obietif é chël da svilupé düc i museums dl Südtirol te na rëi y dai fá deventé posć culturai ciamó plü vis y visibls. Ince por i proscims agn restará le focus dl laur museal sön la jonëza, sciöche ince desmostré dala continuaziun dl proiet „Young&Museum“ che ti pormët ai mituns y ai jogn che á n Südtirol Abo+ da vijité debann indöt 57 museums südtirolej. Chësc é ince n ejëmpl de gran valüta sciöche dui seturs desfarënc (museums y mobilité) pó lauré dër bun adöm.
Video dla conferënza stampa:
Intervista assessur Mussner por ladin:
https://we.tl/VCRH5aB1pP (bëgns culturai)
https://we.tl/3r17tHeXVK (museums)
Files audio
rc
Galaria dales fotografies
