Descurí le monn dles laurs di andri adöm cun le Museum Ladin
D’isté vëgnel organisé vigni jöbia dal Museum Ladin escursciuns acompagnades tl ander de Conturines, olache an á ciafé tl 1987 i resć dla laurs Urus ladinicus.
Ai 23 de setembër dl 1987 á le hotelier y mënacrëp Willy Costamoling da Corvara metü pé por le pröm iade tl ander de Conturines a 2.800 metri sura le livel dl mer, olache al ê perts de n schelet dla laurs preistorica che á viüt dan da presciapüch 40.000 agn. Por descurí la storia dla Laurs dolomitica pita le Museum Ladin Ursus ladinicus da San Ciascian adöm al Ofize Parcs naturai döes scomenciadies al’edema por ghesć y jënt interessada dal post. Dai 30 de jügn cina ai 22 de setëmber vëgnel metü da jí vigni jöbia danmisdé na jita acompagnada de set ores cun les colaboradësses y i colaboradus di parcs naturai al ander de Conturines a 2.800 metri d'altëza. Le punt d'incuntada por la jita, de n livel alt de dificolté cun passa 1.000 metri de deslivel, é la Capanna Alpina (1.726 m) dales 08:30; an röia zoruch dales cater domisdé zirca.
Por la jita acompagnada, che costa 7 euro, mësson se prenoté pro les assoziaziuns turistiches dla Val Badia. Tratan l’isté sará le Museum Ladin davert sides a San Ciascian co ince a San Martin düc i dis: dal lönesc ala sabeda dales 10 ales 18, la domënia dales 14 ales 18. De plü informaziuns ciáfon tl Museum Ladin Ćiastel de Tor, Strada Tor 65, San Martin de Tor, Tel. 0474 52 40 20 y sön internet sot www.museumladin.it/la.
rc
