Dala Junta: Ok al Documënt d’economia y al ddl söl adatamënt dl bilanz
Plü dezijiuns dla Junta incö tl setur finanziar: aprovaziun dl Documënt de economia provinziala y dl ddl söl adatamënt dl bilanz de previjiun 2016.
La Junta provinziala á adoté incö ai 28/06 sön proposta dl presidënt Kompatscher le Defp, le Documënt de economia y de finanza provinziala 2016 y che é la basa por planifiché y atué les ativités dl’Aministraziun publica. Le documënt Defp vëgn elaboré vigni ann dala Provinzia aladô dla normativa statala söl armonisaziun di bilanc y é la basa dles dezijiuns söi programs da realisé y dles ativités de programaziun y de control strategich.
Le documënt aprové incö dala Junta stabilësc les proscimes mosöres por ci che reverda l’elaboraziun de na lege provinziala nöia söl teritore y paesaje, le rezepimënt dla diretiva „Eurovignette“, cun chëra che al sará poscibl da adoté dac desfarënc alado dla classa Euro di auti, l’introduziun dla cherta families, la contlujiun dla rëi capilara dla banda leria por l’internet asvelt y la reforma dl sostëgn dl’economia. La Junta á ince stabilí sciöche obietif na porzentuala dl’ocupaziun dl 80 porcënt te Südtirol por le 2020.
N’atra dezijiun tuta dala Junta incö é stada l’aprovaziun dl dessëgn de lege söl adatamënt dl bilanz de previjiun 2016 y la lege finanziara che alda lapró. Pro les mosöres él lapró: l’ampliamënt dles poscibilités de finanziamënt dla Provinzia tl setur dl refodam (ince por ci che reverda le ressanamënt dles deponies dl ciomënt), de plü flessibilité por les families tl’adoranza dles ores d’assistënza a desposiziun (cun n numer mascimal por ann y nia por mëis) y poscibilités por i Comuns che adora na pert dl avanz d’aministraziun da ciafé inant i contribuc de plü agn bele conzedüs. Le ddl de adatamënt dl bilanz y la lege finanziara vëgn sëgn mená inant al Consëi provinzial por l’ejamniaziun tla Comisciun y spo tl plenum.
rc
