Scolines: Le protocol d’inteja cun i sindacac é gnü firmé
I assessurs Achammer, Tommasini, Mussner y l’assessuria Deeg á firmé incö le protocol d’acordanza tl setur dles scolines adöm ai sindacac.
La Junta provinziala á aprové en mertesc la proposta dl protocol d’acordanza che contëgn de plü punc metüs adöm en acordanza cun i sindacac. Incö, jöbia ai 30 de jügn, á i assessurs por la formaziun Philipp Achammer, Christian Tommasini, Florian Mussner y l’assessuria por le personal Waltraud Deeg firmé le protocol adöm cun i rapresentanc di sindacac. Le documënt d’acordanza contëgn en sostanza cater punc: le orar de laur dles maestres y colaboradësses pedagogiches dles scolines, la situaziun di posć tles scolines, i critérs por l’assegnaziun di posć dl personal tles scolines y la situaziun dles colaboradësses por l’integraziun.
„Chësta acordanza cun i sindacac é ma le pröm vare por tratatives plü generales“, á splighé incö i trëi assessurs por la formaziun Achammer, Tommasini y Mussner „l’acordanza de setur sotescrita contëgn bele mosöres importantes y porta para alisiramënc por le personal dles scolines. Sëgn nen vara da definí strategies de dorada lungia, por mioré la situaziun tles scolines te na manira sostenibla por le dagní.“
Por ci che reverda le orar de laur él preodü de plü mosöres che é bele gnüdes inserides tl’acordanza de setur. Le protocol d’acordanza prevëiga ince che dal ann dles scolines nü 2016/17 gnarál a se le dé tratatives sön n contrat de setur general por le personal dles scolines. Implü él sön le program da alzé le numer di posć tles scolines todësces, deache le numer de mituns por maestra é plü alta tles scolines todësces en relaziun al numer tles scolines talianes y ladines. I critérs por l’assegnaziun di posć dl personal tles scolines y les condiziuns dl personal por l’integraziun dess gní ejaminades cun le scomenciamënt dl ann nü 2016/17. Implü él planifiché mosöres por alzé l’atrativité dl laur dles maestres y colabradësses pedagogiches tles scolines.
„La diminuziun di orars de daurida dles scolines le vëndres domisdé na sará nia na dezijiun che reverda dötes les scolines, mo che messará gní tuta en colaboraziun danter ispeturies, direziuns y intendënzes, a na manira da ti jí ince adincuntra ales esigënzes dles families söl post. Insciö ne gnarál nia a se le dé na diminuziun generala dles ores, mo al messará gní ciafé na soluziun locala en acordanza cun les families“, á dit l’assessuria por les families Waltraud Deeg.
rc
Galaria dales fotografies
