Dala Junta: novités pro l’sistem dles tarifes dl trasport publich
La Junta provinziala á ajorné incö le sistem dles tarifes y les condiziuns por l’adoranza dl sorvisc de trasport publich dles porsones te Südtirol.
„Ince tl dagní messará le sorvisc dl trasport publich se orienté ales esigënzes di anuzadus: nosc obietif é chël da favorí na regolamentaziun tlera dles tarifes y da sostigní n’adoranza costanta di mesi publics“, á splighé l’assessur provinzial por la mobilité Florian Mussner, che á porté incö te Junta la deliberaziun de ajornamënt dl sistem dles tarifes en funziun dal 2014 inant. Tl spezifich él gnü aprové mioraziuns por i lerneri cina ai 18 agn y por i verc y les porsones cun limitaziuns pro l’odüda.
Les tarifes y i abonamënc che é varënc y varëntes atualmënter ne vëgn nia mudades, cun n’ezeziun sora por ci che reverda la cherta por döt le de tles zones de Balsan y Maran che pó gní adorada por un n de zënza limitaziun de iadi. Chësta cherta, che vëgn adorada dantadöt dai turisć, passa da 3 a 4 euro.
La Junta á implü incö aprové na seria de mioramënc al sistem dl trasport publich te Südtirol dantadöt por i lerneri sot ai 18 agn y por i verc y les poronses cun limitaziuns de odüda. Al vëgn insciö integré tl sistem dles tarifes dl Abo+ ince düc i lerneri che fej na scora profescionala: dal proscim ann de scora 2016/17 sará la tarifa anuala por i lerneri sot ai 18 agn nia plü 150 euro mo ma plü 20 euro. La medema soma vëgn ince paiada dai scolars y dai studënc dles scores altes.
Por ci che reverda indere les porsones cun limitaziuns pro l’odüda y i verc ará chisc la poscibilité da jí debann cun i mesi publics zënza conscidré la residënza, chël ó dí che la cherta debann vëgn ince slariada fora ai verc y ales porsones che á limitaziuns pro l’odüda residëntes aldinfora dla Provinzia. Düc i mituns cina ai 6 agn podará s’anuzé inant dla cherta dl trasport publich debann, sciöche ince düc i anuzadus cun n’invalididité zivila de almanco le 74 porcënt y dötes les porsones che fej n sorvisc de volontariat zivil o sozial. Implü gnarál conscidré tl dagní ince sön les ferates locales les alisiraziuns preodüdes dales leges statales por porsones cun handicap y por i iadi di litadus.
rc
